Pavarësisht reshjeve të borës, rrugët në Ferizaj janë të kalueshme

10 janar 17:06

Përkundër reshjeve të vazhdueshme të borës, të gjitha rrugët në Komunën e Ferizajt janë të kalueshme, por në disa vende mund të ketë edhe vështirësi. Nga afër pastrimin e borës e kanë inspektuar edhe zyrtarë të Drejtorisë së Shërbimeve Publike dhe Emergjencës.

Ismajl Mehmeti, zyrtar i kësaj drejtorie është shprehur se mirëmbajtja e rrugëve gjatë këtij viti është në nivelin e kënaqshëm. “Raportimet nga terreni paraqesin gjendje të kalueshme në të gjitha rrugët lokale dhe ato që lidhin fshatrat me qytetin, ndërkohë një gjendje më e rënduar evidentohet në zonën malore të Jezercit dhe Burrnikut, ku niveli i lartë i reshjeve të borës ka bërë të vështirë ndërhyrjen e ekipeve tona, ndonëse është bërë edhe ky intervenim”, është shprehur Mehmeti.

Është bërë me dije se Komuna e Ferizajt së bashku me operatorët ekonomikë janë në gatishmëri të plotë në mënyrë që të mos ketë ndonjë fatkeqësi eventuale.

Me këtë rast apelohet për kujdes të shtuar nga vozitësit si dhe shmangie të qarkullimit përreth zonave malore.

/Epoka e re/

 

Lajme të sponsorizuara