PDK-ja duhet të reflektojë karshi rezultatit të zgjedhjeve

20 shkurt 09:28

Kryetari i Degës i Partisë Demokratike të Kosovës (PDK) në Gjilan, Qemajl Mustafa, ka bërë me dije se kjo parti duhet të reflektojë karshi rezultatit të zgjedhjeve të 14 shkurtit.

Ai ka thënë se PDK-ja do t’i analizojë me kujdes të gjitha rrethanat që kanë sjellë rezultatin e zgjedhjeve të fundit.

Në këtë intervistë dhënë gazetës “Epoka e re”, Mustafa ka treguar për ndryshimet që i duhen PDK-së pas zgjedhjeve të së dielës.

“Patjetër që ne do të reflektojmë karshi këtij rezultati e sidomos karshi diferencës astronomike me LV-në. Neve nuk na gëzon vendi i dytë para një LDK-je tashmë të rrënuar për arsyet e njohura. Ne do t’i analizojmë kujdesshëm, profesionalisht dhe me kulturë demokratike të gjitha rrethanat që e shkaktuan këtë trend gjithëkosovar dhe këtë rezultat për PDK-në, por kurrsesi me nguti e me eufori”, ka thënë Mustafa.

Ai ka treguar se në këtë subjekt ka pasur një ngatërrim të meritave, duke shtuar se PDK-së i duhet një rirreshtim i vlerave brenda strukturave partiake.

“PDK-së i duhet një rirreshtim i mirëfilltë i vlerave brenda saj, që nga nëndegët e deri te kryesia në qendër. Neve na janë ngatërruar meritat shumëvjeçare të atyre që e nderuan partinë me shumë votë dhe me fitore brilante në fshatrat, në qytetet e në komunat e tyre, me vlerat civile të profesionistëve që tërë jetën u kanë bërë shërbim karrierave të tyre personale dhe nëpër procese zgjedhore janë katapultuar hiç më pak se në majë të partisë duke i goditur dhe margjinalizuar rëndë ata të parët”, ka thënë Mustafa, duke shtuar se këtë veprim PDK-ja e ka bërë keq nëpër disa procese zgjedhore.

“Natyrisht që jam plotësisht për ardhjet e reja në parti e sidomos për profesionistët e spikatur, por vetëm me ‘teknologji’ dhe në rrugë tjetër e jo kështu qysh ka ndodhur. PDK-ja për kohë të gjatë është udhëhequr nga njerëzit që kurrë nuk i kanë fituar komunat e tyre. Dikush tjetër argatonte dhe i bënte fitoret e dikush tjetër qeveriste dhe kishte pushtet të pakufishëm rreth liderit. Disa nga ne aktivistët e mirë të saj kemi qenë të privuar nga e drejta për të përparuar në karrierë politike dhe brenda strukturës kemi mbetur ‘xhuxhë’ përkundër rezultateve të shumta të mira që i kishim”, ka thënë Mustafa.

“Epoka e re”: Z. Mustafa, tani kemi rezultatin preliminar të zgjedhjeve të 14 shkurtit. Si e keni parë këtë rezultat?
Mustafa: Ne ishim të vetëdijshëm që ambienti i krijuar politik nuk është në favorin tonë. Dy liderët e PDK-së tashmë gjendeshin në Hagë. PDK-ja ka qeverisur për kohë të gjatë Kosovën dhe asaj i visheshin padrejtësisht të gjitha të metat e ngecjet në shoqërinë e saj, por pakkush i pranonte të arriturat e mëdha që kishin ndodhur që nga çlirimi e këndej. Gjendja ekonomike e familjes mesatare në Kosovë nuk ishte e mirë. Por, përkundër kësaj, me projektin tonë zgjedhor i cili ishte i shkruar me kohë, ishte i lansuar me kohë dhe ishte i plotësisht inkurajues dhe i qartë për të gjithë, kemi pritur rezultat më të mirë. Së paku kemi pritur që ta ruajmë rezultatin e zgjedhjeve të 6 tetorit 2019 e që nuk ndodhi, sepse orteku i votuesve shkoi në favor të LV-së duke i tkurrur të gjitha subjektet e tjera politike por, duhet theksuar, në këtë trend negativ për subjektet që e kishin qeverisur Kosovën deri më tani, më së paku u prek PDK-ja.

“Epoka e re”: Në këto zgjedhje PDK-ja është renditur parti e dytë, por me rezultat jo të mirë. Shifrat flasin për një rënie të kësaj partie krahasuar me zgjedhjet e vitit 2019. Cili është komenti juaj për këtë rezultat?
Mustafa: Ky rezultat flet qartë për strukturën e qëndrueshme dhe shtrirjen e gjerë që ka PDK-ja sepse, përkundër rrethanave rënduese, ajo arriti të jetë imune dhe të mos ‘shembet’ sikurse i ndodhi LDK-së, por edhe AAK-së e Nismës.

“Epoka e re”: Ky rezultat ka nxitur disa reagime të brendshme partiake, duke kërkuar marrje të përgjegjësisë. A mendoni se është koha për ndonjë reformë në këtë parti?
Mustafa: Patjetër që ne do të reflektojmë karshi këtij rezultati e sidomos karshi diferencës astronomike me LV-në. Neve nuk na gëzon vendi i dytë para një LDK-je tashmë të rrënuar për arsyet fare të njohura. Ne do t’i analizojmë kujdesshëm, profesionalisht dhe me kulturë demokratike të gjitha rrethanat që shkaktuan këtë trend gjithëkosovar dhe këtë rezultat për PDK-në, por kurrsesi me nguti e me eufori.

“Epoka e re”: Çfarë duhet të ndryshojë kjo parti për t’u rikthyer në zgjedhjet e ardhshme?
Mustafa: Përgjigjen në këtë pyetje do ta japin rekomandimet pasi që të jetë analizuar mirë ky rezultat dhe kontekstit historik e zgjedhor i Kosovës dhe i PDK-së. Megjithatë, unë jam i prirë ta them atë që unë e mendoj. PDK-së i duhet një rirreshtim i mirëfilltë i vlerave brenda saj, që nga nëndegët e deri te kryesia në qendër. Neve na janë ngatërruar meritat shumëvjeçare të atyre që e nderuan partinë me shumë votë dhe me fitore brilante në fshatrat, në qytetet e në komunat e tyre, me vlerat civile të profesionistëve që tërë jetën u kanë bërë shërbim karrierave të tyre personale dhe nëpër procese zgjedhore janë katapultuar hiç më pak se në majë të partisë duke i goditur dhe margjinalizuar rëndë ata të parët. Këtë veprim PDK-ja e ka bërë keq nëpër disa procese zgjedhore. Natyrisht që jam plotësisht për ardhjet e reja në parti e sidomos për profesionistët e spikatur, por vetëm me “teknologji” dhe në rrugë tjetër e jo kështu qysh ka ndodhur. PDK-ja për kohë të gjatë është udhëhequr nga njerëzit që kurrë nuk i kanë fituar komunat e tyre. Dikush tjetër argatonte dhe i bënte fitoret e dikush tjetër qeveriste dhe kishte pushtet të pakufishëm rreth liderit. Disa nga ne aktivistët e mirë të saj kemi qenë të privuar nga e drejta për të përparuar në karrierë politike dhe brenda strukturës kemi mbetur “xhuxhë” përkundër rezultateve të shumta të mira që i kishim.

“Epoka e re”: Si duhet të sillet PDK-ja në opozitë gjatë këtij mandati?
Mustafa: PDK-ja duhet të sillet tepër kujdesshëm së pari ndaj shëndetit të saj. Asaj i duhet shqyrtim i thellë dhe diagnostifikim i saktë i gjendjes e pastaj terapia plotësisht efektive e cila e këndellë për kohë të shkurtër. Kreu i PDK-së duhet të dëgjojë kujdesshëm atë që e thonë degët e saj e sidomos mbi 1 000 nëndegët e saj për gjendjen e sotme. Opinionet e aktivistëve të mirë në terren janë matja më e mirë që mund ta marrin kryesia dhe Këshilli Drejtues në Prishtinë. Në Kuvendin e Kosovës dhe në kuvendet e komunave PDK-ja duhet të jetë opozitë e angazhuar fort, duhet të jetë hulumtuese, e ditur dhe plotësisht korrekte.

(Muhamet Koci)

Lajme të sponsorizuara

Të fundit
Publikohet historia e panjohur dhe e dhimbshme e kolonel Haxhi…