Dega e Partisë Demokratike të Kosovës (PDK) në Mitrovicë, ka akuzuar Komunën e Mitrovicës për një sërë shkeljesh të pasqyrave financiare gjatë vitit 2019, të cilat janë publikuar nga Zyra Kosovare e Auditimit (ZKA).

Nënkryetari i kësaj dege, Arian Tahiri, në një konferencë ka potencuar 20 shkeljet e gjetura nga ZKA-ja, duke përmendur keqklasifikimin e shpenzimeve në kategori ekonomike joadekuate, parregullsi në kalkulimin e të hyrave nga tatimi në pronë, parregullsi në lëshimin e lejeve të ndërtimit, nënshkrimin e kontratave përtej vlerës së parashikuar të buxhetit, etj.

“Projekti ‘Rregullimi i shtratit të lumit Sitnica’ në Mitrovicë vlera e parashikuar dhe e buxhetuar për tre vite ishte 3 milionë e 100 mijë euro, ndërsa kontrata ishte nënshkruar në vlerë 6 milionë e 45 mijë 726 euro, me një diferencë prej 2 milionë e 945 mijë e 726 euro. Pastaj ‘Rregullimi i shtratit të lumit Ibër’, vlera e parashikuar dhe e buxhetuar për tre vite ishte 950 mijë euro, ndërsa kontrata ishte nënshkruar në vlerë prej 1 milion e 777 mijë e 427 euro, apo 827 mijë e 427 euro më e lartë se vlera e parashikuar”, ka thënë Tahiri.

Më tutje, Tahiri i ka bërë thirrje prokurorisë së shtetit dhe organeve të tjera përgjegjëse që të ndërmarrin veprimet e nevojshme, pasi siç është shprehur ai, duke ju referuar raportit të ZKA-së, tashmë ekzistojnë arsyet ligjore që kryetari i Komunës së Mitrovicës, Agim Bahtiri dhe drejtuesit e tjerë të jenë subjekt trajtimi nga këto organe.

“Të gjitha këto veprime të prezantuara në raport dëshmojnë për shkelje të ligjeve dhe rregulloreve në fuqi. Kjo dëshmon për veprat penale që janë bërë nga kryetari i komunës. Këto veprime do të duhej që kryetarin aktual ta gjenin duke u ballafaquar me drejtësinë në bankën e të akuzuarve… Ju bëj thirrje prokurorisë se vendit dhe organeve të tjera kompetente, që të ndërmarrin veprimet e nevojshme dhe të menjëhershme, pasi që tashmë ekziston arsyeja ligjore, duke ju referuar raportit të auditorit, që kryetari i komunës dhe drejtuesit e tjerë të jenë subjekt trajtimi për hetuesinë”, është shprehur Tahiri. /Ksp/