Ish-kreu i SHISH-it Fatos Klosi u shpreh se të gjitha këto zhvillime të forta në politikë po ndodhin për shkak të interesave që SHBA-ja ka në rajon.

Klosi tha se këto interesa e fundosën Sali Berishën.

“Me Shërbimin Informativ Amerikan janë diskutuar të gjitha figurat politike. Me shërbimet sekrete italiane ca më shumë. Në periudhën e parë të qeverisë Nano dihej që të gjithë ministrat ishin miq nëpër ambasada, kush ishte të grekët, kush te italianet, kush kishte afri me amerikanët.

Interesat e SHBA-së në Shqipëri janë shumë të rëndësishme. Ne e dimë po aq mirë sa ata që ne jemi populli më mirënjohës për ta. Për gjithë historinë tonë të shekullit të fundit, që nga Lufta e Parë Botërore, e këtej, ata na janë gjendur pranë në momente shumë decizive, qoftë për moscopëtimin e Shqipërisë në Luftën e Parë Botërore, qoftë që na pranuan në koalicionin antifashist në Luftën e Dytë Botërore. Ne kurrë nuk kemi pasur një aleat si SHBA-ja. Përplasja e madhe po vjen. Dihet rusët janë përballë, të cilët para një jave thanë se në Bosnjë-Hercegovinë kanë interesa shumë të rëndësishme meqë kanë investuar, në Mal të Zi po ashtu. Domethënë filluan pretendimet. Me largimin nga Ballkani që ndodhi kur u prish Bashkimi Sovjetik dhe vendet kryesore në Evropën Lindore dhe disa vende në Ballkan u futën në NATO, rusët mbetën keq. Dhe tani që po fuqizohen ekonomikisht, u kujtuan që Rusia e ka pasur gjithmonë tentativën të dalë në Mesdhe dhe me Turqinë ka një gjysmë aleance dhe ju duket sikur u ka ardhur dita që të pretendojnë. Ndërkohë kjo konsiderohet shumë e rëndë. Tani që ne jemi në NATO dhe pak vende kanë mbetur pa hyrë në këtë aleancë është e pakonceptueshme që rusët të kenë interesa. Përderisa amerikanët po investojnë kaq shumë në sistemin juridik të këtij vendi, duan që në këtë vend të mos ketë trazira. Dhe sistemi juridik zgjidh nxitjen e trazirave. Nëse dënohen ata që e meritojnë pse do të ketë trazira?”, tha Klosi për Shqip në Dritare TV.