Pesë persona në Pejë akuzohen për keqpërdorim të pozitës zyrtare dhe mashtrim

12 qershor 2019 | 18:41

Prokuroria Themelore e Pejës, Departamenti për Krime të Rënda, ka ngritur aktakuzë kundër të pandehurve D. Sh., G. L., R. Zh. dhe G. Sh., për veprën penale “Keqpërdorim i pozitës apo autoritetit zyrtar” dhe kundër të pandehurit I. K. për veprën penale “Mashtrim”.

I pandehuri D. Sh. akuzohet se në cilësinë e personit zyrtar në Komunë të Pejës me dashje ka tejkaluar kompetencat e veta, pa qenë i autorizuar, duke nënshkruar raportin mbi pranimin e mallit, me çka i ka shkaktuar dëm buxhetit komunal të Pejës në vlerë prej 9 929 eurosh. Të pandehurit G. L., R. Zh. dhe G. Sh., si persona zyrtarë në Komunë të Pejës, përkatësisht anëtarë të komisionit për pranimin e mallit, me dashje nuk i kanë përmbushur detyrat e tyre zyrtare, duke i shkaktuar dëm buxhetit komunal në vlerën e shumës së lartcekur.

Kurse i pandehuri I. K., në cilësinë e pronarit të operatorit ekonomik, si fitues i tenderit për “Blerjen e makinës për mirëmbajtjen e barit artificial për Qendrën Sportive në Brestovik të Pejës”, me anë të paraqitjes së rreme të fakteve, i ka shkaktuar dëme buxhetit komunal të Pejës në vlerë prej 9 929 eurosh. Me këto veprime ekziston dyshimi i bazuar mirë se të pandehurit kanë përmbushur elementet e veprave penale të përshkruar si më lart.

Prokurori i çështjes me rastin e ngritjes së aktakuzës i ka propozuar gjykatës që të pandehurit të shpallen fajtorë dhe të dënohen sipas ligjit për veprat penale të cilat iu vihen në barrë.

Lajme të sponsorizuara

Të fundit
Në ditën kur Kosova po shënon 20-vjetorin e çlirimit, kompania…