BETEJA

E dashur

nëse vonohem

ti mos u mërzit

Në kujtime

t’i kam lënë përqafimet

që do të të ngrohin

derisa të kthehem

nga betejat me jetën…

STACIONI I NDARJEVE

Nëse nuk kthehem

atëherë merre pritjen

bashkë me valixhen e plagëve

dhe nisu me trenin vijues të jetës

Ndoshta takohemi

në ndonjë ndalesë pushimi

Më prit me kujtimin e fundit

që u bë portret stacioni

dhe ku etja e ndarjes

shuhet me lot dhimbje…

NDARJA

Në një mëngjes të zymtë

të stinës pa emër

në Taksim të Stambollit

u shkreha në vaj

nga shakaja e fatit që lundronte

grykës së Bosforit

Jashtë shiu mbulonte gjurmët

e dhembjes që kishte marrë rrugën

të më takonte sërish

në atë stinë të zymtë

kur duhej t’i dorëzohesha

ndarjes

dhe ikjes…

DALJA NGA PIKËLLIMI

Kur shpirtin e çlirova

nga plagët e luftës

nga dhimbjet

brenda trupit të lodhur

u plandosa në kopshtin

e shpresave të humbura

Pastaj me një zë të ngjirur

kam klithur:

e dashur

do t’ia vjedh vdekjes

jetën tënde…

ESHTRAT

Ende i kërkon eshtrat

për ta bërë skeletin e fëmijës

sa për ta lëshuar

në varrin e hapur

Do ta mbulojë

me një lutje

për Kosovën…