Zelensky përsëriti se ai “kurrë” nuk do të pranonte t’ui lëshonte ndonjë territor pushtuesve rusë, duke përfshirë gadishullin e Krimesë të aneksuar ilegalisht, transmeton Telegrafi.

Ai nuk e kundërshtoi një raport të “Washington Post”-it se zyrtarët ukrainas i thanë drejtorit të CIA-s, William Burns, gjatë një udhëtimi të fundit në Kiev, se qëllimi i kundërofensivës ishte të afrohej me kufirin e Krimesë, më pas ta detyronte presidentin rus Vladimir Putin të negocionte.

Kur u pyet nëse ishte “e realizueshme”, Zelensky tha se ishte shumë e mundur.

“Është një retorikë logjike që në momentin që Ukraina arrin kufirin administrativ me gadishullin ukrainas të okupuar përkohësisht, Krimenë, ka shumë të ngjarë që Putini të detyrohet të kërkojë dialog me botën e qytetëruar, ndryshe nga ç’ishte para luftës gjithëpërfshirëse, sepse ai do të dobësohet”, tha Zelensky në një intervistë në rrjetin televiziv amerikan ABC përpara samitit të NATO-s të kësaj jave në Lituani.