QELIA

Dera e hekurt

një dritare

shtrati beton me batanije kali

nënkresë krahët

karrigia me shpinë të prerë

pa një këmbë

tavolina që e grimcojnë krimbat

ditë e natë

gjysmë shapka pa ujë

nevojtore

një bidon bërlloku

qelia

aty brenda trimi

për dy shkronja gjaku,

shkronja drite:

KR

(Burgu ushtarak, Sarajevë, 1983)

QIELLI BIE

Kur e përplasin

derën e qelisë

qielli bie

brenda.

Unë

e ngre përpjetë

me duart

e mia

të forta

(Burgu ushtarak, Sarajevë, 1983)

E GURTA

Nëna

e forta

Nora e Margës*

erdhi me krenari

në ferrin e ujqërisë.

Telat gjemborë s’e lanë

të çmallej me mua.

S’iu pa loti,

kokën lart te qielli

shtrëngoi grushtet

burrërorja:

Do të bëhet mirë, bir!

Tek unë e pa

diellin

e gurta

nëna

(Burgu ushtarak, Sarajevë, 1983)

*Marga, Lumi Morava në kohën e Ilirisë.

NDOSHTA KËNDON DITA

Ndoshta përjashta është ngrohtë!

Dita e bukur si sytë e vajzave

në faqet e kopshteve

pikturon pranvera.

Ndoshta këndon dita!

Në qeli dimër

errësirë

dhe plaga ime

e ngrirë.

(Burgu i Foçës, 1985)

SI PUTRAT E ARIUT

Pjatat e drekës i mblodhën sot

nga qelia e fundit

numër 12

aty ku jam unë.

S’arrita ta fusja lugën

t’i gjeja ato pak kokrra fasuleje.

Një dorë si putra e ariut

ma rrëmbeu pjatën.

U krye dreka.

M’u dhimbsën buburrecat

mbetën të uritur,

njëri mallkoi:

Të vraftë Zoti!

(Burgu ushtarak, Sarajevë)

ME FYTYRA UJQISH

Dhjetë shkopinj gome në kurriz

dhjetë në veshka

s’i harrojnë as brinjët

as shputat e këmbëve.

Edhe dhjetë të tjera

që s’na ndihet ofshama

me duar të lidhura.

Kjo është kënaqësia

e milicëve të kasapit

me fytyra ujqish.

Ne sërish ngjallemi,

qelive ia krisim këngës

sërish.

(Burgu ushtarak, Sarajevë, verë 1983)

KRISMA SHKRONJASH

Shkronja K

15 krisma ka në qeli

R njëzetekatër.

KR

Herë në mure,

herë në hekura.

Kosova Republikë

Ujqit si bien në fije

ulërijnë:

Ç’është kjo krismë e frikshme

pesëmbëdhjetë herë,

pastaj 24?

Krisma shkronjash.

S’e dinë se është

kushtrimi

për Diellin e Kosovës.

(Burgu ushtarak, Sarajevë, 1983)