RRAPI I VENDLINDJES

Është dëshmitar i shumë jetëve

i shumë fatbardhësive

i shumë fatkeqësive

nën hijen e tij më lindi nëna

nën hijen e tij dhe më përkundi

më këndoi këngë gjumi

më dha gji

më dha bukë

më dha ujë

dashuri të madhe më dha nëna

këtu përbri rrapit

ku tashti më rritën

bijtë e mi

si plepat

I THIRRA TË GJITHË LIRIKËT

I thirra të gjithë lirikët

ta heqin elegjinë nga repertori

i luta t’i bëjnë vend gurit të varrit

vend e pa vend

I thirra lirikët një nga një

të pimë lot e të hamë dhembje

ta hamë dhe vetveten po qe e nevojshme

Kësaj ftese iu përgjigj vetëm një

dhe filloi menjëherë të më hajë mua

I thirra edhe një herë tjetër lirikët

ta hapin zemrën

ta heqin mjegullën

të gdhendin në gurë fatin tonë

nën hijen e plepave të fshatit tim