Poezi nga Uran Krasniqi
ZOTI NË FUNDJAVË
Nuk e di
çfarë viti ishte
kur u linde ti
çfarë stine
çfarë muaji
çfarë jave
që të mos bëj
më shumë tautologji
unë orientimisht
e di vetëm një gjë
ishte fundjavë
mbase e shtunë
a e diel
dhe Zoti e kishte pushim
nuk kishte punë tjetër
dhe të krijoi ngadalë
EKZISTENCA
Nuk dua asgjë nga ti
më pëlqen vetëm që ekziston
pak rëndësi ka se në krahët e kujt
sa larg meje
more edhe në fund të botës
në televizor apo në gazetë
më pëlqen vetëm që ekziston
dhe që unë të shoh
e ta kuptoj që s’jam i verbër
ËNDËRR
Mbrëmë m’u hodhe në krah
nuk e di çfarë të kujtohej
duke qarë më thoshe më fal
pas pak u zgjova i përlotur
po mendoja çfarë kisha
nuk mund t’ia falja vetes
që të kisha bërë të qashë
edhe pse vetëm në ëndërr
KURRË S’DO TË VDES
Kurrë më s’do të vdes
kur s’kam vdekur atë ditë
kur e kam parë
që jam bërë dhembja e syve tu
kur në duart e mia
ke parë gjemba të dalë për ty
kur afër e kemi parë
që na ka përshëndetur largimi ynë
kurrë më s’do të vdes
kur s’kam vdekur atë ditë
dhe pse duhet të vdes një herë tjetër
EKSPOZITË
Kur të plakem (nëse mbërrij)
dua ta hap një ekspozitë
me fotografi mjekësore
të zemrës
të syve
të trurit
të këmbëve
dhe do të ftoj (nëse je gjallë)
për ta parë
se si një jetë
të kam bartur në qenien time