Pjesëtarët e Policisë së Kosovës kanë dhuruar gjak me moton “Dhuro gjak, shpëto jetë”, si dhuratë për Vitin e Ri.

Sipas komunikatës së Policisë së Kosovës, dhurimi vullnetar i gjakut është organizuar në Kampin e Njësisë Speciale “Vrella”.

“Policia e Kosovës me të kuptuar mungesën e gjakut në Qendrën Kombëtare të Transfuzionit të Gjakut (QKTGj), është paraqitur vullnetarisht për dhurim të gjakut, e që pastaj në koordinim me Drejtorinë e Shërbimeve Shëndetësore është organizuar aksioni i dhurimit të gjakut nga pjesëtarët e Njësisë Speciale Operative! Në këtë aksion humanitar ka marrë pjesë dhe ka dhuruar gjak edhe drejtori i përgjithshëm i Policisë së Kosovës, kolonel Gazmend Hoxha bashkë me stafin ekzekutiv! Aksionit iu kanë përgjigjur më shumë se 100 pjesëtarë të Policisë në Kampin ‘Vrella’ dhe në Qendrën e Njësive Speciale ‘Enver Zymeri’ në Mitrovicë, si dhe zyrtarë të njësiteve të ndryshme të cilët kanë dhuruar gjak në QKTGj”, është thënë në komunikatën e policisë.

Sipas kësaj komunikate, pjesëtarët e policisë edhe këtë herë kur Qendra Kombëtare e Transfuzionit të Gjakut ka nevojë shumë për gjak, u bë promotor në ofrimin e pjesës më të shtrenjtë nga trupi i tyre-gjakut, duke u bërë shembull për të tjerët! “Dhuro gjak, shpëto jetë”, është dhurata më e mirë për ata që kanë nevojë.