Një incident është raportuar të ketë ndodhur të enjten në qytetin e Skenderajt, ku kryetari i degës së Lëvizjes Vetëvendosje në Skenderaj, Hysni Mehani, ka pretenduar se është sulmuar nga kryetari i kësaj komune, Sami Lushtaku, i cili vjen nga radhët e Partisë Demokratike e Kosovës (PDK), si dhe nga siç e ka quajtur ai “banda e tij”.

Në anën tjetër, Lushtaku ka mohuar sulmin, derisa theksoi se qytetarët reaguan pasi u etiketua si “Sami Serbia”.

Pas këtij rasti, janë aktivizuar Policia e Kosovës dhe Prokuroria Themelore në Mitrovicë.

“Policia e Krimeve të Rënda është duke shkuar në vend ngjarje edhe në koordinim me prokuroren kujdestare janë tu i ndërmarrë të gjitha veprimet. Ende policia s’ka dalë në vendngjarje dhe ende nuk ka urdhëresë për t’u intervistuar dikush”, ka thënë për “Betimi për Drejtësi”, Valon Prenteni, zëdhënës i Prokurorisë Themelore në Mitrovicë.

Ndërsa Spitali i Përgjithshëm i Mitrovicës ka njoftuar se dy persona me lëndime, njëri në fytyrë e kokë dhe tjetri me gërvishtje, kanë kërkuar ndihmë mjekësore.