Portugalia ka shënuar fitore 2-0 ndaj Uruguait dhe siguron një biletë për në fazën tjetër të Kupës së Botës. “Luzitanët” në fakt e nisën më mirë me dy tentativa të Joao Felix dhe Ronaldos, që do të devijoheshin nga mbrojtja kundërshtare.

Ndërkohë në krahun tjetër, Bentancur kishte shansin më të mirë përballë portierit në minutën e 32-të, por Costa e ndali mjaft mirë.

Portugalia luan më mirë në pjesën e dytë dhe do të gjente dhe golin. Në minutën e 54-t, Bruno Fernandes jep një krosim magjik për Cristiano Ronaldon, i cili e prek me flokë, por FIFA ia ka atribuar mesfushorit dhe jo atij.

Uruguai tentoi të reagonte, por shtylla për fatin e keq do të ndalte një goditje të Gomez. Luzitanët ishin me fat, pasi në fundin e ndeshjes do të fitonin një penallti, që do të kthehej në gol nga Bruno Fernandes. Portugalia siguron kualifikimin me këtë fitore, pasi udhëheq me 6 pikë.