Presidenti rus, Vladimir Putin theksoi se kundërofensiva ukrainase nuk ishte e suksesshme dhe se përpjekjet e forcave ukrainase për të thyer linjat e mbrojtjes ruse kishin dështuar. Ai i bëri këto komente gjatë një interviste në televizionin shtetëror, pjesë të së cilës u bënë publike sot.

“Të gjitha përpjekjet e armikut për të thyer linjat tona mbrojtëse… dështuan gjatë gjithë ofensivës ”, tha Putin. Presidenti rus tha gjithashtu se situata është “pozitive” për forcat ruse në front. Të premten, Andrii Yermak, shefi i shtabit të presidentit ukrainas, pranoi se kundërofensiva e Kievit nuk po ecte aq shpejt.

Megjithatë, ai shtoi se aleatët perëndimorë nuk kishin bërë presion mbi Kievin për këtë çështje. E udhëhequr që nga qershori me mbështetjen e armëve të rënda të furnizuara nga Perëndimi, kundërofensiva po lëviz ngadalë kundër trupave ruse të cilat kanë pasur kohë për të ndërtuar mbrojtje të forta, veçanërisht fusha të minuara, dhe kanë ende fuqi të konsiderueshme zjarri për të goditur forcat ukrainase.