1.5 miliard euro kanë hyrë kosovarët kredi në vitin 2022.

Këtë shifër e ka thënë deputeti i Partisë Demokratike të Kosovës, Bekim Haxhiu në lidhje me atë se çfarë po ndodh me shqyrtimin për tërheqjen e 30 për qind të mjeteve nga Trusti, nismë kjo nga qytetarët e ku mbi 21 mijë nënshkrime ishin deponuar në Kuvendin e Kosovës.

Haxhiu ka vlerësuar se kjo shumë e marrjes së kredisë nga qytetarët është bërë për shkak të inflacionit dhe rritjes së çmimeve, e ku sipas tij, nga kjo shumë e kredive për shtetasit e Kosovës, një pjesë e konsiderueshme është shpenzuar për blerjen e druve për ngrohje, ushqimeve bazike e gjërave tjera elementare.

Sipas tij, kjo është dëshmia me e mirë që Kuvendi i Kosovës duhet të votojë për tërheqjen e 30 për qind të parave nga Trusti për shkak të krizës ekonomike dhe rritjes enorme të çmimeve të produkteve bazë.

Megjithatë, ka një lajm të mirë për të gjithë qytetarët e Kosovës.

“Nisma qytetare ka pasur të trajtohet në seancën e fundit të dhjetorit, por kjo u zvarrit në Komisionin për Buxhet që drejtohet nga Armend Muja. Tani kanë kaluar të gjitha afatet ligjore dhe të Rregullores së Punës së Kuvendit dhe qysh në seancën e parë të sesionit të ri në javën e tretë të janarit mund të futet në rend dite kjo nismë qytetare”, ka thënë Bekim Haxhiu

Sipas Haxhiut, lehtësisht mund të kaloj në Kuvend kjo nismë për arsye se ka një reflektim edhe të deputetëve të shumicës, këtë rast të Lëvizjes Vetëvendosje.

“Ju e patë atë ditë në komision se dy deputet të LV-së abstenuan. Ka një diskonim te deputetët e partisë në pushtet që të votohet pro”, ka thënë Haxhiu.

E iniciuesi i kësaj nisme, Adnan Jashari ka thënë për “Gazeta Blic” se nuk ka informatë se kur mund të jetë në rend dite kjo pikë, por ka kërkuar që sa më parë të jetë si pikë e rendit të ditës sepse sipas tij, çdo ditë qytetarët po e pyesin se çfarë po ndodh me 30 për qind të parave nga Trusti.

“Po presim që sa me shpejt të dalë për rend dite pasi që afatet kanë përfunduar dhe po zvarritet tashmë qëllimshëm!”,  ka thënë ai.

Tri partitë opozitare: PDK-ja, LDK-ja dhe AAK-ja kanë kërkuar që kjo nismë për trustin të kaloj në Kuvendit e Kosovës për shkak të inflacionit.

Ato kanë kritikuar ashpër qeverinë e Kosovës se po mbanë të “bllokuar” mbi 700 milionë euro në llogarinë e qeverisë.

Duke u nisur nga kjo ata kanë kërkuar që Trusti duhet të kaloj në Kuvendin e Kosovës.