Raketa të Francës gjenden në bazën e komandantit Haftar në Libi

10 korrik 15:17

Franca ka mohuar se ka shkelur një embargo armësh të Kombeve të Bashkuara, edhe pse katër raketa të saj antitank janë gjetur në bazën e një komandanti rebel në Libi.

Ministria e Mbrojtjes e Francës ka thënë se nuk është synuar kurrë që raketat “e papërdorshme” “Javelin” të kalonin te ndonjë grup dhe se ato ishin në prag të shkatërrimit.

Megjithatë, raketat janë zbuluar në një kamp në jug të kryeqytetit libian, Tripoli, të përdorur nga forcat besnike të gjeneralit Khalifa Haftar.

Forcat e Haftarit po luftojnë aktualisht për kontrollin e Tripolit.

Lufta për këtë qytet, i cili kontrollohet nga një qeveri e njohur nga Kombet e Bashkuara, është intensifikuar kur forcat e Haftarit kanë nisur ofensivën në muajin prill.

Katër raketat janë zbuluar në qershor, kur forcat e qeverisë në Tripoli hynë në kampin e Haftarit.

Ngjarja ka nxitur hetime nga Uashingtoni.

Të mërkurën, Franca ka pranuar se armët që mund të përdoren kundër tankeve dhe automjeteve të tjera i përkasin asaj.

Por, ajo ka shtuar se raketat ishin “të dëmtuara dhe të papërdorshme”.

Franca gjithmonë e ka mohuar armatosjen e forcave të gjeneralit Haftar, por ajo u ka ofruar atyre mbështetje diplomatike.

Lajme të sponsorizuara

Të fundit
“…Ballkani ka nevojë për Europianizim në kuptimin më të gjerë…