Kryeministri i Shqipërisë, Edi Rama, ka publikuar një fotografi me drejtorin e Përgjithshëm të Kompanisë “Pfizer” e cila ka prodhuar vaksinën e parë të koronavirusit me efikasitet 95 për qind.

“Takimi pozitiv me bosin e ‘Pfizer’, Albert Burla, në qendrën e kompanisë prodhuese të vaksinës në Nju Jork, përmbylli komunikimet tona të kësaj vizite kërkimore për të siguruar vaksinën për Shqipërinë, një sfidë e jashtëzakonshme në kushtet e një kërkese globale marramendëse”, ka thënë Rama.

Rama ka theksuar se ambicia e qeverisë shqiptare është që brenda shkurtit të nisë vaksinimi.

“Prodhimi është ende shumë më i ulët sesa kërkesa botërore. Por, ambicia jonë është të mos mbetemi mbrapa në radhën e stërgjatë të shteteve që kërkojnë vaksinën! Përveç kanalit të sapohapur për vaksinën ‘Pfizer’ do hapim në vijim edhe kanalet për vaksinat ‘Moderna’ dhe ‘Astrazeneca’”.

“Ambicia jonë është që brenda dy muajve të parë të vitit të ri të nisim vaksinimin! Duket e pamundur po ne do t’ia dalim, pavarësisht vështirësisë së skajshme në këtë situatë për të gjithë, ku sidoqoftë vendet më të vogla e me të ardhura më të ulëta janë dhe më të dizavantazhuarat!”, ka Rama.