Raportet e mediave spanjolle kanë zbuluar se Real Madridi e ka bërë prioritet kryesor përforcimin e mesfushës gjatë afatit kalimtar veror, duke e vendosur në krye të listës së dëshirave mesfushorin argjentinas të Chelseat, Enzo Fernandez.

Sipas gazetës spanjolle AS, drejtuesit e klubit madrilen kanë vendosur të fokusohen te Fernandez pasi disa opsione të tjera në tregun e transferimeve nuk kanë rezultuar të realizueshme. Si pasojë, ylli i Chelseat është shndërruar në objektivin kryesor për forcimin e mesfushës, në përputhje me kërkesat e trajnerit portugez, José Mourinho.

Burimet bëjnë të ditur se Mourinho e ka pasur Enzo Fernandezin në krye të listës së tij që nga fillimi, duke e konsideruar mesfushorin ideal për projektin e tij, falë aftësisë për të lidhur mbrojtjen me sulmin, cilësive udhëheqëse dhe nivelit të lartë teknik në organizimin e lojës dhe kontrollin e ritmit të ndeshjeve.

Raportet shtojnë se Real Madridi tashmë ka nisur përgatitjet për të kontaktuar Chelsean në ditët në vijim, duke u mbështetur edhe në dëshirën e lojtarit për të veshur fanellën e klubit madrilen. Fernandez thuhet se u ka bërë të ditur drejtuesve të Real Madridit gatishmërinë e tij për të bërë gjithçka që është e mundur për ta përfunduar transferimin.

Megjithatë, marrëveshja nuk pritet të jetë e lehtë, pasi lojtari ka kontratë afatgjatë me Chelsean deri në verën e vitit 2032. Për më tepër, klubi londinez pagoi mbi 120 milionë euro për transferimin e tij, çka nënkupton se çdo negociatë do të kërkonte një ofertë të konsiderueshme financiare, e cila mund të kalojë shifrën e 100 milionë eurove.