Sërish tensione mes ShBA-së dhe Kinës, tash shkaku i Tajvanit

12 korrik 14:54

Kina ka bërë me dije se do të vendosë sanksione ndaj kompanive amerikane që i shesin armë Tajvanit, pasi Uashingtoni ka miratuar shitjen e mundshme të tankeve, raketave dhe pajisjeve tjera në vlerë prej 2.2 miliardë dollarë.

Ministria e Jashtme e Kinës ka theksuar se shitja e armëve dëmton sovranitetin e Kinës, si dhe ndikon në sigurinë kombëtare të saj.

Shtetet e Bashkuara janë furnizuesi kryesor i armëve për Tajvanin e vetë-qeverisur, të cilin Kina e konsideron një krahinë të saj. Pekini nuk ka hequr dorë kurrë nga mundësia e përdorimit të forcës për ta sjellë ishullin nën kontrollin e tij, raporton “Rel”.

Një diplomat kinez, Wang Yi, ka paralajmëruar ShBA-në, se “nuk duhet të luajnë me zjarrin” në çështjen e Tajvanit.

Gjatë një vizite në Hungari, Wang ka thënë se asnjë forcë e huaj nuk mund të ndalojë ribashkimin e Kinës, dhe asnjë forcë e huaj nuk duhet të përpiqet të ndërhyjë.

Zyra e Presidentit të Tajvanit ka shprehur mirënjohje për Qeverinë e ShBA-së për shitjen e armëve.

“Tajvani do t’i përshpejtojë investimet në mbrojtje dhe do të vazhdojë të thellojë lidhjet e sigurisë me Shtetet e Bashkuara dhe vendet me ide të ngjashme” ka thënë zëdhënësi presidencial, Chang Tun-han.

Marrëdhëniet midis Kinës dhe Shteteve të Bashkuara kanë qenë të tensionuara në muajt e fundit për shkak të tregtisë dhe asaj që Uashingtoni e konsideron si militarizim të Kinës në Detin e Kinës Jugore.

Lajme të sponsorizuara

Të fundit
Mbrojtësi shkodran i kombëtares shqiptare të futbollit, Elseid Hysaj ka…