Qeveria amerikane ka transferuar mijëra armë dhe municione në Ukrainë pasi i kapi ato nga anijet që me sa duket kishin nisur për në Jemen.

Komanda Qendrore e SHBA-së (CENTCOM) tha se i kapi armët në fund të vitit të kaluar ndërsa ato po transportoheshin nga Korpusi i Gardës Revolucionare Islamike të Iranit te rebelët Houthi të Jemenit, shkruan Sky News.

U zbuluan rreth 5,000 AK-47, mitralozë, pushkë snajper, RPG-7 dhe më shumë se 500,000 fishekë municionesh.

CENTCOM deklaroi se armët tashmë janë transferuar në Ukrainë për ta ndihmuar atë të mbrohet kundër pushtimit rus.

“Mbështetja e Iranit për grupet e armatosura kërcënon sigurinë ndërkombëtare dhe rajonale, forcat tona, personelin diplomatik dhe qytetarët në rajon, si dhe ato të partnerëve tanë. Ne do të vazhdojmë të bëjmë gjithçka që mundemi për të hedhur dritë dhe për të ndaluar aktivitetet destabilizuese të Iranit”, thuhej më tej në deklaratë./abcnews.al