Shoqata e Kosovës për Kërkim dhe Shpëtim ka arritur ta nxjerr të gjallë një 26-vjeçare nga rrënojat në Turqi.

Kështu bëri të ditur anëtari i kësaj shoqate, Fanol Shala.

“Gjatë ditës së sotme kemi arritur që ta nxjerrim të gjallë një 26-vjeçare. Këtë e kemi arritur me asistencën e ekipeve turke. Ajo është dërguar me autoambulancë në spital”, tha Shala për Klan Kosovën.

Ai bëri të ditur se deri gjatë ditës i kanë nxjerr tetë trupa të pajetë.

“Gjatë ditës kemi arritur që t’i nxjerrim 7-8 trupa të pajetë. Aktualisht kemi dyshime se nën rrënoja janë edhe katër trupa të pajetë, por në bazë të aparaturës që kemi po sinjalizon për rrahje të zemrës. Pra, mund të jetë edhe dikush i gjallë”, tha ai.

Ekipi i Kërkim-Shpëtimit nga Kosova gjendet i stacionuar në Hataj të Turqisë.

Numri i përgjithshëm i të vdekurve pas tërmetit të fuqishëm me magnitudë 7.8 që goditi Turqinë dhe Sirinë ka arritur në 36 mijë.

Kjo shifër mund të rritet edhe më shumë.

Me kalimin e ditëve përpjekjet e autoriteteve po ndryshojnë, nga shpëtimi i të mbijetuarve të bllokuar nën rrënoja, në ofrimin e strehimit, ushqimit dhe kujdesit psikosocial për miliona njerëzit e prekur nga kjo fatkeqësi.

Sipas një raporti të Konfederatës turke të Ndërmarrjeve dhe Bizneseve riparimi i dëmeve të tërmetit mund t’i kushtojë Ankarasë deri në 84 miliardë dollarë, ndërsa qeveria turke i ka vlerësuar dëmet në mbi 50 miliardë dollarë.