Janë duke vazhduar thirrjet për pjesëmarrje masive në protestën gjithëkombëtare në mbështetje të UÇK-së dhe drejtësi për krerët e saj në Hagë, e cila do të mbahet në Tiranë.

Afaristi dhe drejtuesi politik i Partisë Demokratike të Kosovës (PDK) në Gjermani, Shqiptar Gubetini u ka bërë thirrje shqiptarëve të marrin pjesë masivisht në protestën gjithëkombëtare që do të mbahet më 17 tetor 2025, në orën 17:00, në sheshin “Skënderbej” në Tiranë.

Protesta synon të jetë një shprehje e unitetit kombëtar dhe e mbështetjes për vlerat e luftës së UÇK-së, si dhe një reagim ndaj padrejtësive që po u bëhen liderëve të UÇK-së në proceset gjyqësore në Hagë, përfshirë Hashim Thaçin, Kadri Veselin, Jakup Krasniqin, Rexhep Selimin, etj.

Në ftesën e tij publike, Gubetini  ka theksuar se është momenti që zëri i qytetarëve të dëgjohet fuqishëm. “Koha është tani që zëri ynë të dëgjohet fuqishëm — për dinjitetin kombëtar, për të drejtat tona dhe për vlerat që i kemi mbrojtur me sakrificën shekullore”, ka thënë Gubetini.

Ai ka bërë thirrje për bashkim dhe pjesëmarrje masive, duke e përmbyllur mesazhin e tij me fjalët: “Le të jemi bashkë, krah për krah, si dikur! Për lirinë, për të ardhmen, për drejtësinë!”

Sipas organizatorëve dhe mbështetësve, kjo protestë pritet të jetë manifestim gjithëkombëtar i bashkimit dhe solidaritetit në mbrojtje të figurave të luftës dhe vlerave kombëtare shqiptare.

Thirrja e Gubetinit për pjesëmarrje në protestën gjithëpopullore:

FTESË PËRKRAHËSE

Edhe pak ditë na ndajnë nga Protesta gjithëkombëtare në Tiranë!

Koha është tani që zëri ynë të dëgjohet fuqishëm — për dinjitetin kombëtar, për të drejtat tona dhe për vlerat që i kemi mbrojtur me sakrificën shekullore.

🗓 E premte, 17 Tetor 2025

⏰ Ora 17:00

📍 Sheshi “Skënderbej” – Tiranë

Le të jemi bashkë, krah për krah, si dikur!

Për lirinë, për të ardhmen, për drejtësinë!