AHMED METAR

SIKUR TË ISHA PRESIDENT

Sikur të isha president arab,
do ta zgjidhja problemin
dhe do ta rehatoja popullin
nga barrët që e kanë rënduar.
Unë, sikur të isha president,
do t’i ftoja presidentët
dhe do t’u mbaja një fjalim të shkurtër
për vuajtjet që i përjeton populli ynë,
dhe për sekretin e mjerimit,
do t’i ndërprisja të gjitha pyetjet,
do ta lexoja besmelen
dhe do ta hidhja bombën
mbi ta e mbi veten time.

LAPSI

Mjeku ma mati pulsin,
e më tha:
“A ndien dhembje këtu?”
“Po” – i thashë.
Me bisturi ma preu xhepin e palltos,
dhe e nxori lapsin…
E tundi kokën… u përkul pak dhe buzëqeshi,
“nuk ka gjë pos lapsit” – tha
“Jo, zotëri” – i thashë
kjo është dorë… e gojë…
plumb… e gjak…
dhe padi e dukshme… që ec pa këmbë…!

SHPRESA

Dje i telefonova shpresës,
e pyeta:
“A mund të nxirret parfumi nga peshku i kripur dhe qepa?”
“Mundet” – tha.
E pyeta:
“Po a mund të ndizet zjarri me ujë?”
“Mundet” – tha.
E pyeta:
“A mund të shtrydhet mjalti nga kungulli i egër?”
“Po” – tha.
E pyeta:
“A mund të futet Toka në xhepin e Saturnit?”
“Po, tha, gjithsesi, gjithçka është e mundur”.
E pyeta:
“Atëherë, edhe qeveritarët arabë do të turpërohen mbase një ditë?”
Tha: “Pështyje fytyrën time nëse kjo ndodh!”

QENI I PRIJËSIT

Qeni i prijësit tonë të madh
më kafshoi sot dhe ngordhi
më ftoi roja i sigurisë për t’më ekzekutuar
kur ja, autopsia konfirmoi
se qeni i prijësit tonë të madh ishte helmuar.

PËRSHTATJA E RITMIT

Motra ime mësoi të luajë në violinë
unë mësova të luaj në ud
nëna ime luante në skllavëri me mjeshtëri
kurse babai im ishte baterist i shkëlqyer
Opozita na luti me përgjërim për t’iu bashkuar orkestrës së saj
pasi talentet tona ishin shumë të domosdoshme për të mirëmbajtur vallëzimin në litar
në të njëjtën kohë, me përgjërim na luti qeveria
për t’iu bashkuar orkestrës së saj
pasi talentet tona ishin shumë të nevojshme për ta mirëmbajtur ligjin
ne jemi ende shumë të habitur
uh, çfarë habie ndiejnë të talentuarit në këtë vend që e dashuron artin!

ZGJIMI

Mëngjesin e kësaj dite
më zgjoi alarmi i orës
e më tha: o bir arapi,
erdhi koha e gjumit.
 
Ahmed Metar është poet irakian. Ka lindur në vitin 1954 në Basra. Metar filloi të shkruajë poezi në moshën katërmbëdhjetëvjeçare dhe shumë shpejt u bë i njohur me botimin e pamfleteve politike. Është autor i disa përmbledhjeve me poezi dhe i disa pamfleteve. Këtë poezi, edhe disa të tjera të tij, posaçërisht për numrin e gjashtë të revistës “Akademia”, e ka përkthyer Jahja Honduzi.