Kërkimet për gjetjen e trupave të Alma Arrazit dhe dy fëmijëve të saj nuk do të ndalen as gjatë orëve të mbrëmjes.

Burime pranë policisë së Shkodrës bëjnë me dije se pavarësisht errësirës për shkak të orëve të mbrëmjes kërkimet nuk do të ndërpriten. Drejtoria e Shkodrës ka angazhuar banorët e zonës, të cilët do të dalin më varkat e tyre në kërkim të trupave.

Nga drejtoria do t’i vihet në dispozicion çdo mjet që do të bëjë më të lehtë kontrollin në lumin Buna, duke i pajisur edhe me projektorë të mëdhenj duke shpresuar në gjetjen e trupave të pajetë.

Palombarët e forcave RENEA ndodhen që prej orëve të para të mëngjesit duke kontrolluar përgjatë brigjeve të lumit Buna, nga zona përreth qytetit të Shkodrës, në zonën e Dajçit dhe Anës së Malit dhe në grykëderdhjen e Bunës por deri tani pa rezultat.

Dyshohet se, Alma bashkë me tre fëmijët janë hedhur nga ura e Bunës, duke u mbytur kështu në ujërat e lumit Drin, ndërsa deri më tani është gjetur vetëm trupi i vajzës 9-vjeçare të familjes, ndërkohë që, vijojnë kërkimet për gjetjen e trupave të tjerë.

Çifti në proces divorci, 31-vjeçari i pashqetësuar

Gazetari i Euronews Albania, Teodor Gjerga, ka zbyluar në emisionin “Review” të tjera detaje lidhur me ngjarjen e rëndë të ndodhur në Shkodër, ku një 39-vjeçare bashkë me tre fëmijët e saj të mitur dyshohet të jenë vetëmbytur në lumin Bunë, pas dhunës së ushtruar nga kryefamiljari.

Gjerga tha se ka informacione se çifti ka qenë në proces divorci për shkak të tradhëtisë së 31-vjeçarit kundrejt bashkëshortes së tij.

Ai tha gjithashtu se ata që kanë qëndruar pranë 31-vjeçarit gjatë këtyre ditëve, nuk kanë vënë re te ai ndonjë shqetësim, lidhur me zhdukjen e familjarëve të tij, pavarësisht denoncimit që ai kishte bërë në polici.

“Në dëshminë e parë të Policisë, ku ajo e ka specifikuar se ngjarja ka qenë e shtyrë për shkak të dhunës fizike e psikologjike të bashkëshortit, edhe në këtë moment Policia i qëndron atij versioni, nisur kjo nga dëshmia e motrës së 39-vjeçares.

Kanë qenë të martuar dhe kanë qëndruar në një banesë në qendër të Shkodrës. Një detaj interesant është fakti se këto ditë personat që kanë qëndruar me 31-vjeçarin nuk kanë vërejtur asnjë lloj shqetësimi nga ana e tij, edhe pasi ai ka bërë denoncimin. Pra asnjë lloj shqetësimi se ku ndodhen familjarët. Ai ka refuzuar në Polici të japë detaje nga martesa me 39-vjeçare. Ai ka kundërshtuar akuzat se ka ushtruar dhunë ndaj bashkëshortes.

Çifti ka qenë në proces divorci, për shkak të marrëdhënieve jashtëmartesore që ka pasur 31-vjeçari. Për shkak të problemeve që ka pasur çifti. Disa burime na thonë se 39-vjeçarja ka vuajtur edhe nga probleme të shëndetit mendor”, tha Gjerga.