Boksierët nga Kosova, Donjeta Sadiku dhe vëllezërit Bashkim dh3 Shpetim Bajoku ndodhen në Arsizio të Italisë, ku nga sot (e diel) e deri më 11 mars do të mbahet turneu i parë kualifikues botëror për Lojërat Olimpike Paris 2024.

Boksierët nga Kosova do të kërkojnë normën olimpike, të parën ndonjëherë për sportin e boksit në Kosovës.

Federata e Boksit e Kosovës përmes një postimi ka theksuar se për ta fituar biletën, Sadikut, që garon në kategorinë -60 kilogramë, i duhet të përfundojë në njërën nga tri pozitat e para, që nënkupton se edhe arritja në gjysmëfinale nuk siguron kualifikimin, pasi duhet zhvilluar lufta për vendin e tretë.

Kjo federatë ka njoftuar se për dallim nga Sadiku, Bajokëve u mjafton kualifikimi në gjysmëfinale për të siguruar biletën për Paris.