Forcat ruse nuk kanë bërë asnjë përparim përgjatë vijave të frontit, por janë të ngulitura në zonat e minuara rëndë që ata kontrollojnë, duke e bërë të vështirë për trupat ukrainase lëvizjen në lindje dhe në jug, thanë zyrtarët ukrainas të mërkurën.

Trupat ruse të luftimeve në vijën e frontit thanë se 12 sulme ukrainase ishin zmbrapsur në rajonin e Donetskut – një pikë qendrore e përparimeve ruse për muaj të tërë.

Pjesa më e madhe e aktivitetit ushtarak rus u përqendrua në sulmet ajrore që dëmtuan infrastrukturën e grurit në portin e Danubit të Ukrainës, Izmail.

Ministria e Mbrojtjes e Rusisë tha gjithashtu se forcat e saj kishin shkatërruar një dron të marinës ukrainase që u përpoq të sulmonte një anije luftarake ruse që shoqëronte një anije civile në Detin e Zi.

Forcat ukrainase nisën një përpjekje në qershor për të rimarrë zonat e pushtuara dhe kanë bërë presion drejt jugut drejt Detit të Azov për të shkëputur një urë tokësore midis Ukrainës lindore të pushtuar dhe gadishullit të Krimesë të aneksuar nga Rusia.

Kyiv thotë gjithashtu se ka rimarrë zonat pranë Bakhmut, një qytet lindor i pushtuar nga forcat ruse në maj pas disa muajsh beteja.

Zëvendësministrja ukrainase e Mbrojtjes Hanna Maliar tha se forcat ruse “u përpoqën me mjaft këmbëngulje të ndalonin përparimin tonë në sektorin Bakhmut. Por pa sukses.”

Sipas saj, forcat ruse, po shtojnë rezervat dhe pajisjet në tre zona më në veri, ku janë raportuar luftime të ashpra, gjatë javëve të fundit.

Ministri i Mbrojtjes i Rusisë, tha se forcat ukrainase kishin bërë përpjekje të pasuksesshme për të përparuar në disa zona si në pjesën jugore ashtu edhe në atë veriore të rajonit të Donetskut.

Ai tha gjithashtu se trupat ruse kishin kryer sulme ajrore në qytetet përreth Bakhmutit.