Kryetari i Kuvendit të Kosovës, Kadri Veseli, së bashku me kryeministrin Ramush Haradinaj dhe kryetarin e Komunës së Ferizajt, Agim Aliu, kanë bërë hapjen e punimeve të projektit “Bashkimi i Qytetit” në Ferizaj, i cili kapë vlerë prej 4 milionë dollarësh dhe përfshin ndërtimin e nënkalimit për automjete që do të lidh rrugët “Vëllezërit Gërvalla” me “Latif Hasani”, deri te rrethrrotullimi afër Shtëpisë së Pensionistëve.

Në fjalën e tij para shumë qytetarëve ferizajas, kryeparlamentari Veseli ka thënë se është emocionuese kur kaq shumë qytetarë marrin pjesë në ceremoninë e fillimit të një projekti, duke dëshmuar kështu nevojën e kahershme të tij.

“E di që ky projekt ka qenë ëndërr për qytetarët e Ferizajt. Sigurisht ka pasur edhe skepticizëm. Por ky projekt do të realizohet shumë shpejt, duke i dhënë qytetit të Ferizajt një dimension të ri, zhvillim dhe perspektivë, e njëkohësisht do të krijojë siguri për nxënësit dhe të gjithë ferizajasit në përgjithësi”, është shprehur Veseli.

Kreu i Kuvendit ka thënë se sikurse qyteti i Ferizajt, po ndryshon e gjithë Kosova. Ai ka theksuar se Kosova po ecë vendosmërisht në rrugëtimin e saj evropiane.

“Jemi të vetëdijshëm se ka ende shumë për të bërë dhe ende nuk po e arrijmë perspektivën të cilën të rinjtë tanë e duan. Thërras gjithë të rinjtë që të qëndrojnë në Kosovë dhe ta bëjmë bashkë ndryshimin. Vizioni ynë është shumë i qartë: integrimi euro-atlantik dhe zhvillimi ekonomik”, ka deklaruar Veseli, duke shtuar se ajo çfarë u duhet më së shumti qytetarëve është besimi.

“Kush kishte besuar para 20 vjetëve se do të realizohen projekte të tilla në Ferizaj?

Kush kushte besuar se Ferizaj do të lidhej me këtë lloj autostrade moderne me Shkupin? Ky është vetëm fillimi. Do të fillojë edhe projekti i hekurudhës, duke evituar rrezikun për qytetarët, i cili do të përfundojë në afat rekord”, ka thënë Veseli, duke falënderuar kryetarin e Komunës, Agim Aliu, për vendosmërinë e tij që ky projekt të realizohet.

/Epoka e re/