Zyrtarë të Qendrës së Lëvizjes Vetëvendosje në Prishtinë ka mbajtur të hënën një konferencë për medie, në lidhje me qeverisjen në Komunën e Prishtinës, ku sipas tyre kjo komunë ka përmbysur për të keq frymën e madhe të ndryshimit, transparencën dhe bashkëpunimin me qytetarët.

Deputeti i Lëvizjes Vetëvendosje dhe ish-drejtori i Drejtorisë së Inspekcionit, Salih Zyba, ka kërkuar që të ndalen ndërtimet pa leje dhe të kthehet transparenca për lejet ndërtimore.

“Ndryshimet e sjella që me qeverisjen e mirë të Lëvizjes Vetëvendosje në Komunën e Prishtinës, u vërejtën menjëherë. Sidomos, transparenca, guximi dhe veprimi për ta ndalur degradimin e mëtutjeshëm urban të Prishtinës. Falë kësaj dhe shumë punëve të tjera, Lëvizja u dyfishua me vota, ndërsa në zgjedhjet lokale i fitoi edhe dy komuna tjera dhe e rifitoi Prishtinën’”, ka thënë Zyba.

Në këtë kontekst, ai ka theksuar edhe heqjen dorë të Shpend Ahmeti nga zbatimi i programit, zotimeve para qytetarëve e votuesve të Lëvizjes dhe të tij personalisht, që i dhanë besimin për të qeverisur mirë.

Ndërsa asamblisti i Lëvizjes Vetëvendosje në Prishtinë, Abër Vokrri, ka folur për sfidat dhe punët të cilat ishin bërë për të lehtësuar jetën e qytetarët dhe ndaluar të keqën në bashkëpunim të ngushtë me qytetarët, kurse në anën tjetër, ka folur për degradimin e qeverisjes së Shpend Ahmetit në të gjitha drejtimet, madje duke lejuar edhe ndërtimet pa leje.