Haradinaj tha se ndryshimi nis nga qytetarët dhe nga vota e secilit që, sipas tij, është i gatshëm të ndëshkojë politikën pa rezultate dhe mungesën e zhvillimit. “Vitomiricë, ndryshimi vjen nga ju. Vjen nga Peja. Vjen nga vota e secilit që kësaj radhe vendos të ndëshkojë politikën pa rezultate, politikën që ka harruar qytetarin dhe ka lënë pas zhvillimin”, deklaroi ai. Ai theksoi se pjesëmarrja e qytetarëve në takime po i jep Aleancës besim dhe siguri se ndryshimi është afër, duke e cilësuar këtë periudhë si vendimtare për Pejën dhe Kosovën. Haradinaj prezantoi edhe prioritetet e programit politik, duke përmendur zhvillimin ekonomik, sigurinë, energjinë dhe mirëqenien për familjet kosovare. “Plani ynë është zhvillim, siguri, energji dhe mirëqenie për çdo familje. Jo fjalë boshe, por punë, përgjegjësi dhe rezultate që ndihen në jetën e përditshme”, u shpreh ai. Në fund, ai bëri thirrje për mobilizim qytetar, duke thënë se Kosova meriton një drejtim të ri dhe më të përgjegjshëm.