Zelanda e Re dërgon trupa në Angli për t’i trajnuar ushtarët ukrainas

23 maj 2022 | 08:30

Kryeministrja e Zelandës së Re Jacinda Ardern ka thënë se vendi i saj do të dërgojë 30 trupa shtesë të forcave të mbrojtjes në Mbretërinë e Bashkuar për të ndihmuar në trajnimin e homologëve të tyre ukrainas.

Ardern tha se ushtarët do të ndihmonin në trajnimin e forcave të armatosura ukrainase se si të përdorin një armë fushore të lehtë 105 mm L119.

“Ne kemi qenë të qartë gjatë gjithë sulmit të Rusisë ndaj Ukrainës, se një sulm i tillë flagrant ndaj jetëve të pafajshme dhe sovranitetit të një vendi tjetër është i gabuar, dhe përgjigja jonë nuk ka përfshirë vetëm dënimin e Rusisë, por mbështetjen praktike për Ukrainën”.

Kryeministrja tha se trupat do të vendosen në Mbretërinë e Bashkuar deri në fund të korrikut dhe do të trajnojnë 230 ukrainas.

“Ekipit tonë të trajnimit i është kërkuar të ndihmojë në trajnimin e anëtarëve të forcave të armatosura të Ukrainës në përdorimin e sistemit të armëve deri në fund të korrikut”, shtoi ajo.

“Kjo mbështetje e re vjen si shtesë e ndihmës së gjerë që i kemi dhënë tashmë Ukrainës, e cila përfshin aspektet ushtarake, humanitare, ligjore dhe aspekte të tjera të konfliktit. Ne do të vazhdojmë të monitorojmë situatën dhe do të punojmë së bashku me partnerët tanë për të siguruar që ne të vazhdojmë të japim një kontribut kuptimplotë dhe efektiv”, tha ajo, transmeton Klankosova.tv.

Lajme të sponsorizuara

Të fundit
Kancelari gjerman, Olaf Scholz, përsëriti apelin e tij drejtuar presidentit…