Presidenti i Ukrainës, Volodymyr Zelensky, mori pjesë në një ceremoni në Kiev të shtunën, duke shënuar Ditën e Flamurit Kombëtar të Ukrainës.

Festa fillimisht u shënua në vitin 2004 me një dekret presidencial nga presidenti i atëhershëm Leonid Kuchma, transmeton Telegrafi.

Kjo festë përkujton ditën kur deputetët ukrainas sollën flamurin e kaltër dhe të verdhë në parlamentin ukrainas – ndërsa ata shtynin përpara drejt pavarësisë pas një grushti-shteti të dështuar sovjetik më 23 gusht 1991.

Kievi shpalli pavarësinë e tij nga Bashkimi Sovjetik të nesërmen. Çdo vit, në prag të Ditës së Pavarësisë, flamuri i Ukrainës ngrihet mbi ndërtesat qeveritare dhe nga dritaret në të gjithë vendin për të festuar këtë rast. Flamuri nuk është vetëm një simbol i shtetit, por edhe i dinjitetit dhe identitetit kombëtar që bashkon ukrainasit.

E mbrëmë Zelensky ka regjistruar një video-fjalim drejtuar ukrainasve në Ditën e Pavarësisë.

“Ne po ndërtojmë një Ukrainë mjaftueshëm të fortë dhe të fuqishme për të jetuar në siguri dhe paqe. Në mënyrë që këtu, në këtë shesh, në sheshin tonë të Pavarësisë, nën flamujt tanë, në tokën tonë, fëmijët dhe nipërit tanë ta festojnë Ditën e Pavarësisë. Në paqe. Në qetësi. Me besim në të ardhmen. Me respekt. Dhe me mirënjohje për të gjithë ata që mbrojtën Ukrainën në këtë luftë për Pavarësi. Për ata që duruan, që fituan, që arritën fitoren. Një qëllim i tillë ia vlen të jetohet. Dhe kjo është ajo për të cilën ne qëndrojmë. Gëzuar festën juve, njerëz të mëdhenj të një vendi të madh”, tha presidenti ukrainas.