Arbërie Nagavci nga radhët e Lëvizjes Vetëvendosje, ka pranuar detyrën e ministres së Arsimit dhe Shkencës.

Me këtë rast, ministri i deritashëm i kësaj ministrie, Ramë Likaj, ia ka uruar Nagavcit detyrën e re, duke kërkuar nga ajo që t’i vazhdojë punët e mira në fushën e arsimit.

“Uroj e shpresoj që do të vazhdohen punët e mira dhe  vendi ynë do të numërojë edhe shumë të arritura të tjera në fushën e arsimit”, ka shkruar Likaj në llogarinë e vet në “Facebook”.

Postimi i plotë i Likajt:

Me përgjegjësinë dhe konsideratat më të larta i dorëzova detyrën e Ministres së Arsimit dhe Shkencës zonjës Arbërie Nagavci.

Gjithsesi, përpjekjet e mia për të kontribuar në fushën e arsimit do t’i vazhdojë edhe më tutje.

Ministria e Arsimit dhe Shkencës si institucion në këto kohë sfiduese me pandeminë pati dhe ka sfida të panumërta para vetes. Pavarësisht kësaj, ne kemi nisur shumë punë të mbara e gjithmonë ka vend për të bërë më shumë.

Uroj e shpresoj që do të vazhdohen punët e mira dhe  vendi ynë do të numërojë edhe shumë të arritura të tjera në fushën e arsimit.

Të gjithëve na bashkon qëllimi i arritjes së cilësisë dhe gjithëpërfshirjes në arsim. Të gjithë ne kalojmë në procesin e arsimimit që na përcakton të ardhmen dhe parametrat e zhvillimit shoqëror.