Sekretari i Përgjithshëm i Nismës Socialdemokrate, Bilall Sherifi, ka vlerësuar se riaktualizimi i projekteve të ndarjes së Kosovës janë të rrezikshme për paqen dhe sigurinë rajonale.

Në profilin e tij në “Facebook”, ai ka shkruar se qarkullimi i hartave për ndarje të re të kufijve në Ballkanin Perëndimor e ka burimin në kuzhinat ekspansioniste serbe.

Ai ka kërkuar nga institucionet ndërkombëtare që të dënojnë përmbajtjen e rrezikshme të kësaj tendence.

Postimi i plotë i Sherifit:

Riaktualizimi i projekteve të ndarjes së Kosovës, rrezik për paqen dhe sigurinë rajonale!

Qarkullimi i hartave për ndarje të re të kufijve në Ballkanin Perëndimor e ka burimin në kuzhinat ekspansioniste serbe dhe ato të përhapjes së ndikimit rus në këtë pjesë të Evropës. Për Nismën Socialdemokrate publikimi i projekteve të kësaj natyre është rrezik për paqen dhe sigurinë rajonale, e cila është e ambalazhuar në atë formë që ka për synim të përgatis opinionin publik për gjoja stabilizimin e rajonit duke kënaqur apetit pushtuese të Serbisë.

Kërkojmë nga institucionet ndërkombëtare që të dënojnë përmbajtjen e rrezikshme të kësaj tendence që nuk është asgjë tjetër pos paralajmërim i luftërave të reja në Ballkan. Ftojmë Presidenten e Kosovës, Kryeministrin e Qeverisë së Kosovës dhe të gjithë ata që rrezikun nga ndarja e Kosovës e bënë kauzë të tyre politike të japin përgjigje të qartë kundër këtij rreziku!