FC Alba Augsburg do të organizojë të shtunën, më 18 korrik 2026, Festën Verore 2026, një aktivitet tradicional që synon të bashkojë anëtarët, mbështetësit, sponsorët dhe mërgatën shqiptare në një mbrëmje festive.

Manifestimi do të nisë në orën 17:00, në adresën Zugspitzstraße 175, 86165 Augsburg, ku kryesia e klubit ka përgatitur një program të veçantë për të gjithë pjesëmarrësit.

Sipas organizatorëve, kjo festë organizohet si shenjë falënderimi për besimin, mbështetjen dhe kontributin e vazhdueshëm të anëtarëve, mbështetësve dhe sponsorëve, të cilët kanë qenë dhe mbeten themeli i zhvillimit, sukseseve dhe fuqizimit të FC Alba Augsburg.

“Le ta kalojmë së bashku një mbrëmje të ngrohtë, në frymën e miqësisë, respektit dhe bashkëpunimit, duke festuar arritjet tona dhe duke forcuar lidhjet që na bashkojnë si një familje e madhe e FC Alba Augsburg”, thuhet në ftesën drejtuar mërgatës shqiptare për pjesëmarrje në Festën Verore 2026.

FC Alba Augsburg konsiderohet një nga klubet shqiptare më të organizuara në diasporë. Krahas aktiviteteve sportive, klubi zhvillon edhe veprimtari kulturore dhe sociale për të gjitha grupmoshat, duke promovuar bashkëpunimin, ruajtjen e identitetit kombëtar dhe afrimin e komunitetit shqiptar.

Qëllimi i klubit është të mbajë të bashkuar diasporën shqiptare dhe të krijojë mundësi që familjet shqiptare, së bashku me fëmijët e tyre, të mblidhen në aktivitete kulturore, sportive dhe festive, duke forcuar lidhjet ndërmjet brezave dhe komunitetit.