Deputeti i Partisë për Veprim Demokratik në Kuvendin e Serbisë, Shaip Kamberi, ka deklaruar se deklarata e ministres serbe Snezhana Paunoviq po shkakton frikë te shqiptarët që jetojnë në Serbi dhe ka kërkuar reagim urgjent nga qeveria serbe.

Kamberi tha se Qeveria duhet të deklarohet sa më shpejt lidhur me deklaratën e ministres për Administratë Publike dhe Vetëqeverisje Lokale, e cila në një intervistë për Kurir TV deklaroi se “po të ishte në vendin e Sllobodan Millosheviqit në vitin 1998, do ta kishte kryer spastrimin etnik të Kosovës”.

Sipas Kamberit, kjo deklaratë dëmton kredibilitetin ndërkombëtar të Serbisë dhe procesin e dialogut me Kosovën, ndërsa njëkohësisht krijon pasiguri te pakicat kombëtare, veçanërisht te shqiptarët.

“Deklarata e ministres Paunoviq mbjell frikë te shqiptarët që jetojnë në Serbi. Ajo nuk mund të bëjë asgjë për Kosovën; ajo mund vetëm të kërkojë shpenzime udhëtimi atje”, ka thënë Kamberi.

Ai ka ngritur pyetjen se pse Qeveria serbe po hesht për këtë çështje dhe ka kërkuar që të sqarojë nëse kjo retorikë është pjesë e politikës së saj.

“Duhet që brenda ditës ose më së voni deri nesër, Qeveria të deklarohet për këtë deklaratë skandaloze, sepse një qëndrim i tillë nuk duhet të jetë pjesë e një qeverie që deklaron se synim të politikës së jashtme ka anëtarësimin në Bashkimin Evropian”, ka thënë ai.

Kamberi ka kritikuar gjithashtu reagimet e zyrtarëve të lartë serbë, duke thënë se heshtja e tyre mund të tregojë përpjekje për ta mbuluar rastin.

Sipas tij, deklarata e Paunoviqit është pjesë e një narrative që, sipas tij, ka qenë e pranishme në politikën publike serbe për vite me radhë, përmes mohimit të krimeve të luftës dhe glorifikimit të figurave të dënuara për krime lufte.

Ai ka paralajmëruar se kjo çështje mund të ndikojë negativisht në marrëdhëniet e Serbisë me Kosovën dhe Shqipërinë.