Drejtori i Institutit Demokratik të Kosovës (KDI), Ismet Kryeziu, ka thënë se mosthirrja e seancës konstituive të Kuvendit dhe arsyetimi i presidentes në detyrë se partive politike u duhet më shumë kohë është qesharak.

Kryeziu tha se subjektet politike kanë pasur kohë të mjaftueshme për të negociuar dhe se mund ta bëjnë këtë edhe pas konstituimit të Kuvendit.

Ai gjithashtu ka kritikuar subjektet politike opozitare, duke thënë se asnjëra prej tyre nuk ka bërë kërkesë publike apo veprim konkret për konstituimin sa më të shpejtë të Kuvendit.

Statusi i plotë i Kryeziut:

“Mosthirrja e seancës konstituive të Kuvendit dhe arsyetimi i presidentes në detyrë, znj. Albulena Haxhiu, se partive politike duhet t’u lihet edhe më shumë kohë për negociata, është sa qesharak, aq edhe i papërgjegjshëm ndaj qytetarëve.

Për më tepër, partitë kanë pasur kohë sa të duash për të negociuar dhe mund të vazhdojnë të negociojnë edhe pas konstituimit të Kuvendit. Nuk mund të mbahet peng përmbushja e një detyrimi kushtetues me arsyetimin se duhen edhe më shumë bisedime.

Ndërkohë, vendi vazhdon, prej afro dy vitesh, të funksionojë me institucione në detyrë dhe me zgjidhje të improvizuara. Nëse gati dy vjet, së bashku me tri palë zgjedhje të mbajtura, nuk po mjaftojnë për të arritur qoftë edhe një marrëveshje minimale, sa kohë tjetër u duhet? Dhe me çfarë arsyetimi?

Po aq e papërgjegjshme është edhe qasja e partive opozitare. Deri më tani, ato nuk kanë bërë asnjë kërkesë publike dhe asnjë veprim konkret për konstituimin sa më të shpejtë të Kuvendit.

Kjo situatë, së bashku me paaftësinë për të tejkaluar interesat partiake dhe individuale, po e normalizon një perceptim se kjo klasë politike, këta akterë aktualë, nuk kanë as kapacitetin dhe as përgjegjësinë për të ndërtuar, funksionalizuar dhe mirëmbajtur institucionet e një shteti demokratik.

Shkalla e zhvillimit demokratik nuk matet vetëm me organizimin e zgjedhjeve, por edhe me aftësinë për ta shndërruar vullnetin e qytetarëve në institucione funksionale, efektive dhe llogaridhënëse.”