“Terafab” është projekti i ri i shpallur nga Elon Musk, për ndërtimin në Teksas të një fabrike çipash nga Tesla dhe SpaceX.

Sipas il messaggero.it, në këtë impiant do të prodhohen gjysmëpërçues të destinuar për inteligjencën artificiale dhe robotikën.

Përmes një postimi në X, Musk vlerësoi projektin e parashikuar të kompleksit dhe deklaroi se “Terafab Texas” do të jetë, me diferencë të konsiderueshme, ndërtesa me vlerën më të lartë në botë.

Për fillimin e punimeve, Tesla dhe SpaceX, planifikojnë një investim prej 16.8 miliardë dollarësh. Dokumentet e dorëzuara pranë autoriteteve rregullatore, të cilat u publikuan këtë javë, tregojnë se kostoja e përgjithshme mund të shkojë deri në 119 miliardë dollarë përgjatë disa fazave.

Synimi është që “Terafab Texas” të renditet si ndërtesa më e vlefshme në botë.

Analistët përllogarisin se fabrika mund të krijojë çdo vit mbi një trilion njësi të kapacitetit përpunues për inteligjencën artificiale.

Prodhimi në këtë kompleks do të mbështetet te teknologjia e çipave 2 nanometra, e cila konsiderohet ndër teknologjitë më të përparuara të disponueshme sot.

Përmasat e planifikuara të “Terafab” nxitën menjëherë krahasime në rrjetet sociale me disa nga strukturat më të mëdha të planetit.

Në imazhet krahasuese, fabrika shfaqej përkrah Gigafactory-t të Tesla-s në Austin, godinave qeveritare, kampuseve të kompanive dhe qendrave tregtare të projektuara për të mirëpritur miliona vizitorë në vit.