55 raste të të shtënave festive janë raportuar në Kosovë gjatë muajve qershor dhe korrik, kryesisht në dasma dhe ahengje familjare.

Sipas Ministrisë së Punëve të Brendshme (MPB), Policia e Kosovës ka shoqëruar 48 persona dhe ka konfiskuar 47 armë zjarri në kuadër të këtyre rasteve.

MPB-ja ka falënderuar qytetarët për raportimin e rasteve dhe i ka inkurajuar që të vazhdojnë të denoncojnë të shtënat festive.

Në kuadër të fushatës “Festo me zemër, jo me armë”, ministria synon të rrisë vetëdijen për rrezikun e keqpërdorimit të armëve dhe të kontribuojë në krijimin e një ambienti më të sigurt gjatë ahengjeve familjare.