Fakulteti i Inxhinierisë Mekanike (FIM) i Universitetit të Prishtinës dhe Administrata Tatimore e Kosovës (ATK) kanë nënshkruar marrëveshje bashkëpunimi, me qëllim forcimin e bashkëpunimit institucional dhe ndërlidhjen e ekspertizës akademike me nevojat profesionale të ATK-së.

Një numër i studentëve të FIM-it tashmë janë në përfundim të praktikës profesionale me pagesë në ATK.

Gjatë kësaj periudhe, studentët kanë dëshmuar profesionalizëm, përkushtim dhe përgjegjshmëri në kryerjen e detyrave që u janë besuar, duke krijuar një përvojë të vlefshme profesionale.

Marrëveshja parasheh bashkëpunim në fushën e ekspertizës inxhinierike, vlerësimit të aseteve dhe përgatitjes së raporteve teknike, si dhe zhvillimin e aktiviteteve të përbashkëta profesionale, trajnuese dhe akademike.

Marrëveshja është nënshkruar nga prof. Mirlind Bruci, Dekan i Fakultetit të Inxhinierisë Mekanike të Universitetit të Prishtinës, dhe Mentor Hyseni, drejtor i Përgjithshëm i Administratës Tatimore të Kosovës.

Në shenjë respekti dhe mirënjohjeje për bashkëpunimin dhe mbështetjen e ofruar ndaj studentëve të FIM-it, drejtorit të përgjithshëm të ATK-së, Mentor Hyseni, iu dhurua trofeu i FIM-it, i punuar nga studentët e Fakultetit të Inxhinierisë Mekanike.

Ky bashkëpunim përbën një mundësi të rëndësishme për studentët e FIM-it që njohuritë akademike t’i ndërlidhin me përvojën praktike, si dhe për forcimin e bashkëpunimit ndërmjet Universitetit të Prishtinës dhe institucioneve publike.

Ky bashkëpunim shënon një hap të rëndësishëm në forcimin e partneritetit ndërmjet FIM-it dhe institucioneve publike, duke krijuar mundësi për studentët, stafin akademik dhe institucionet që përmes dijes, ekspertizës dhe përvojës së përbashkët të kontribuojnë në zhvillimin profesional dhe institucional.