Autoritetet kanë bërë të ditur se dy adoleshentë kanë mbetur të plagosur rëndë pas një sulmi me shpatë në një shkollë të mesme në Suedi.

Policia u thirr në shkollën “Brinell” në Fagersta pak pas orës 14:00 me orën lokale (13:00 BST) të së premtes, ku efektivët arrestuan një burrë, shkruan BBC.

Një person i tretë u plagos gjatë sulmit, por shkalla e lëndimeve të tij nuk është konfirmuar, ndërsa raportimet në mediat lokale thonë se i dyshuari u qëllua në këmbë nga policia.

Tetë shkolla të tjera në zonë iu nënshtruan masave të izolimit – të cilat tashmë janë hequr – ndërsa në rajonin e Vastmanlandit u shpall gjendje alarmi të lartë pas sulmit.

Policia ka deklaruar se aktualisht nuk ka rrezik për publikun.