Rusia ka vazhduar sulmet me dronë në disa rajone të Ukrainës gjatë natës, pavarësisht njoftimit të presidentit Vladimir Putin për ndalimin 72-orësh të goditjeve ndaj qytetit të Kievit.

Sipas autoriteteve ukrainase, një 74-vjeçar u vra dhe tre persona të tjerë u plagosën nga sulmet në rajonin e Zaporizhzhias. Nga goditjet u dëmtuan edhe ndërtesa banimi.

Sulme u raportuan gjithashtu në rajonin e Kievit, jashtë kryeqytetit. Autoritetet thanë se dronët shkaktuan zjarre në një zonë të gjerë, të cilat u shuan gjatë mëngjesit.

Edhe rajoni i Dnipropetrovskit u godit gjatë natës. Forcat Ajrore të Ukrainës deklaruan se Rusia lëshoi 108 dronë, prej të cilëve 82 u rrëzuan ose u neutralizuan nga mbrojtja ajrore. Sipas tyre, goditje u regjistruan në të paktën 11 lokacione.

Pauza e shpallur nga Putini vlen vetëm për qytetin e Kievit dhe nuk përfshin rajonin përreth apo pjesët e tjera të Ukrainës. Ajo u njoftua në prag të vizitës së të dërguarve amerikanë Steve Witkoff dhe Jared Kushner në kryeqytetin ukrainas. Kyiv Independent

Witkoff dhe Kushner pritet të zhvillojnë bisedime me presidentin ukrainas Volodymyr Zelensky, pas takimit treorësh që zhvilluan të shtunën me Putinin në Kremlin.