Ish-ushtari i UÇK-së dhe trajneri i klubit futbollistik “Llapi” nga Podujeva, Tahir Batatina, u ka bërë thirrje qytetarëve, pa dallime politike, që të marrin pjesë të shtunën në “Marshin e Lirisë” në kryeqytet.

Thirrja e plotë e Batatinës:

Të nderuar dhe të respektuar populli im i dashur i Kosovës, të nderuar dhe të respektuar shqiptarë, kudo që jetoni!

Nesër, për mua dhe për shumë bashkëluftëtarë të mi, është një ditë e veçantë. Ne ishim të rinj kur iu bashkuam luftës. Ishim të rinj kur e fituam lirinë. Bashkë u gëzuam, bashkë qajtëm dhe bashkë kujtuam heronjtë dhe martirët tanë, ata që ranë për ta gëzuar lirinë që e kemi sot.

Kujtuam edhe bashkëluftëtarët tanë që për vite me radhë u mbajtën në paraburgime dhe përballuan gjykime, duke u përballur me akuza dhe pretendime të ndërtuara mbi shpifje e propagandë ruse e serbe kundër luftës së drejtë të Ushtrisë Çlirimtare të Kosovës.

Eprorët dhe udhëheqësit ushtarakë e politikë të UÇK-së, nga vijat e frontit, rrugëtuan drejt marrëveshjeve me forcat aleate në Rambuje. Aty u bë edhe më e qartë para botës e vërteta për agresionin dhe luftën e drejtë të popullit tonë për liri.

Kosova fitoi një aleat të fuqishëm në krahun e saj: NATO-n. Ajo filloi luftën nga ajri, ndërsa Ushtria Çlirimtare e Kosovës luftonte nga toka, me një qëllim të vetëm: ta dëbonte njëherë e përgjithmonë agresorin nga trojet tona.

Prandaj, nesër duhet të jemi të bashkuar!

Pa anime politike, pa dallime fetare, pa ndarje krahinore. Të bashkohemi si një komb i vetëm shqiptar, nga të gjitha viset ku jetojmë.

T’i tregojmë botës se shqiptarët dinë të bashkohen në momentet vendimtare, se dimë ta mbrojmë drejtësinë dhe se lufta çlirimtare e Kosovës ishte luftë e drejtë për liri.

Nesër duhet të dërgohet një mesazh i qartë:

Populli e bëri luftën, populli e fitoi lirinë dhe populli shqiptar i mbron vlerat e luftës së tij çlirimtare dhe luftëtarët e lirisë.

Nuk ka asnjë arsye që nesër të jetë një ditë e zakonshme pune. Nesër duhet të jetë një ditë bashkimi, një ditë për të mbrojtur vlerat tona kombëtare dhe për të dëshmuar se nuk harrojmë sakrificën e atyre që ranë për lirinë tonë.

Të gjithë bashkë, pa dallime dhe pa përçarje.

Për Kosovën, për lirinë dhe për të vërtetën!