Trajneri i Fenerbahçes, Ismail Kartal, ka njoftuar dorëheqjen pas barazimit 1:1 me Romën në Ligën e Kampionëve, pasi gjatë ndeshjes një tifoz e kishte goditur me shishe në kokë.

Kartal e ka bërë me dije dorëheqjen gjatë konferencës për media pas ndeshjes në Stamboll, duke thënë se vendimin e kishte marrë për t’ia hapur rrugën klubit.

65-vjeçari ka deklaruar se po largohej për të mos u kthyer më, ndërsa ka falënderuar lojtarët, stafin dhe tifozët për mbështetjen.

Megjithatë, presidenti i Fenerbahçes, Aziz Yıldırım, e ka refuzuar dorëheqjen dhe ka konfirmuar se Kartal do të vazhdojë të jetë trajner i skuadrës.

“Unë jam eprori i tij. I kam thënë të vazhdojë dhe kjo është e tëra. Ne jemi familje”, ka deklaruar Yıldırım.

Presidenti i klubit ka thënë se incidenti me shishen dhe presioni i madh ndaj trajnerit kanë ndikuar në vendimin e Kartalit për të dhënë dorëheqje.

Fenerbahçe ka njoftuar ndërkohë se personi që hodhi shishen në drejtim të Kartalit është identifikuar dhe i është ndaluar hyrja në stadium.

Fenerbahçe e nisi aventurën në fazën e ligës së Ligës së Kampionëve me barazimin 1:1 ndaj Romës, në rikthimin e klubit turk në këtë fazë të garës pas 18 vjetësh.

Në këtë ndeshje, sulmuesi kosovar Vedat Muriqi luajti deri në minutën e 72-të dhe pati një mundësi të artë për ta kaluar Fenerbahçen në epërsi, por gjuajtja e tij u ndal nga portieri i Romës.