Kryetari i Partisë Demokratike të Kosovës (PDK), Bedri Hamza, ka reaguar pas aktgjykimit të Dhomave të Specializuara të Kosovës në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.

Hamza ka shkruar se PDK-ja e kundërshton vendimin, të cilin e ka cilësuar si “të padrejtë dhe të papranueshëm”.

“Sot në Hagë u godit rëndë e drejta e popullit tonë që luftoi për liri, mbijetesë dhe çlirim nga regjimi shtetëror serb që vrau, dëboi dhe terrorizoi shqiptarët e Kosovës”, ka shkruar Hamza në “Facebook”.

Sipas tij, aktgjykimi është bazuar në pretendime dhe materiale që PDK-ja i konsideron të fabrikuara dhe që, sipas tij, janë përdorur ndër vite nga Serbia për ta kriminalizuar luftën e UÇK-së.

Ai ka theksuar se, sipas qëndrimit të PDK-së, lufta e UÇK-së ishte “e drejtë, mbrojtëse dhe çlirimtare”, ndërsa ka deklaruar se përgjegjësia për luftën dhe krimet e kryera ndaj shqiptarëve të Kosovës i takon regjimit të Serbisë.