Deputeti i LDK-së, Armend Zemaj, ka thënë se zgjedhja e ish-ministres së PDK-së, Justina Shiroka-Pulës, presidente dhe votimi i Ligjit për Gjykatën Speciale nga ana e Vetëvendosjes kanë nxjerrë në pah “dy të vërteta politike”.

Zemaj ka thënë se është dëshmuar që për Vetëvendosjen mund të jetë i pranueshëm një president politik që vjen nga PDK-ja, por jo një president politik që vjen nga LDK-ja.

“Vetëm nga LDK-ja kërkohej konsensual?”, ka pyetur Zemaj.

Gjithashtu, ai ka thënë se me votën pro për Ligjin për Specialen mbrëmë, Vetëvendosje në praktikë ka pranuar edhe vetë ekzistencën dhe juridiksionin e Gjykatës Speciale në Hagë.

“Dje, ping-pongu politik LV-PDK mori fund. Votat treguan shumë më tepër se fjalët”, ka shkruar Zemaj në “Facebook”.

Postimi i plotë:

Mirëmëngjesi Kosovë!

Dje, Kuvendi i Kosovës i dha vendit Presidenten e re, pas një procesi të gjatë me debate, pritje, prapaskena, kushtëzime dhe lojëra politike në stilin e ping-pongut.

Por e vërteta, herët a vonë, del në shesh.

Dhe dje u shpalosën qartë dy të vërteta politike.

E para: për LV-në mund të jetë i pranueshëm një president politik që vjen nga PDK-ja, por jo një president politik që vjen nga LDK-ja. Vetëm nga LDK-ja kërkohej konsensual?

E dyta: LV-ja votoi për ndryshimet në Ligjin për Dhomat e Specializuara dhe Zyrën e Prokurorit të Specializuar, pra, në praktikë, pranoi edhe vetë ekzistencën dhe juridiksionin e Gjykatës Speciale në Hagë.

Këto nuk janë më vetëm debate politike, as ndarje ideologjike, por janë veprime e votime të regjistruara në Kuvend.

Dje, ping-pongu politik LV -PDK mori fund.

Votat treguan shumë më tepër se fjalët.