Një çift nga Kina është bërë sensacion në rrjetet sociale, pasi u zbulua se burri dhe gruaja kanë saktësisht të njëjtin emër, madje të shkruar me të njëjtat karaktere kineze.

Zhu Xiaocong, 33 vjeç, dhe Zhu Xiaocong, 28 vjeçe, u martuan më 6 tetor në provincën Zhejiang, në lindje të Kinës.

Historia e tyre mori vëmendje pasi në internet u shpërnda një fotografi nga dasma, në të cilën emrat e nuses dhe të dhëndrit ishin identikë, raporton “South China Morning Post”.

Sipas mediave ndërkombëtare, disa të afërm të nuses, të cilët nuk e njihnin dhëndrin, fillimisht menduan se organizatorët e dasmës kishin bërë një gabim në shkrimin e emrit.

Një fotografi e shpërndarë në internet nga dasma u bë virale, duke zbuluar se çifti kishte saktësisht të njëjtin emër, të shkruar me të njëjtat karaktere kineze. Foto: E vënë në dispozicion.

Por kjo nuk është e vetmja rastësi që i bashkon.

Çifti jo vetëm që ka të njëjtin emër, por vjen nga e njëjta provincë dhe punon në sektorin e aviacionit civil.

Ata u takuan për herë të parë në vitin 2016, në një panair punësimi.

Kur emri Zhu Xiaocong u thirr gjatë një interviste pune, të dy u ngritën njëkohësisht, duke zbuluar këtë rastësi të pazakontë.

Më vonë, një koleg i dhëndrit, i cili kishte studiuar më parë me nusen, vuri re se ata kishin të njëjtin emër dhe i prezantoi me njëri-tjetrin.

Çifti e nisi lidhjen në vitin 2019.

Megjithatë, përputhja e emrave u ka sjellë edhe disa vështirësi praktike.

Gjatë procedurave për regjistrimin e martesës dhe dokumenteve të pronësisë, sistemet kompjuterike patën vështirësi në dallimin e të dhënave të tyre, ndaj disa procedura u kryen manualisht.