Një histori që ka emocionuar shikuesit dhe një personazh që ka lënë gjurmë në serialet vendore po rikthehen me një kapitull të ri, plot të papritura dhe ngjarje prekëse. Seriali i njohur “ALI” rikthehet para publikut me episode të reja, duke sjellë vazhdimin e historisë së një personazhi që, pavarësisht sfidave të shumta, nuk ka reshtur së luftuari për një jetë më të mirë. I njohur për përmbajtjen e tij sociale dhe trajtimin e temave që prekin drejtpërdrejt shoqërinë, “ALI” është një produksion i frymëzuar nga ngjarje të vërteta, ku ndërthuren drama njerëzore, bullizmi, paragjykimet, padrejtësitë, por edhe solidariteti, miqësia dhe humanizmi. Në këtë vazhdim, publiku do të njihet me një anë tjetër të jetës së Aliut. Pas një të kaluare të mbushur me dhimbje dhe humbjen e njerëzve që kishin rëndësi të veçantë për të, personazhi kryesor nis një mision personal: të zbulojë të vërtetën për familjen e tij dhe të gjejë njerëzit me të cilët e lidh gjaku. Rruga drejt së vërtetës nuk do të jetë e lehtë. Mes kujtimeve, zhgënjimeve dhe takimeve të papritura, Aliu do të përballet me sprova që do ta vënë sërish në provë forcën dhe besimin e tij. Përmes këtij rrëfimi, seriali sjell jo vetëm një histori emocionuese, por edhe një mesazh sensibilizues për shoqërinë, duke dëshmuar se çdo njeri meriton dashuri, përkrahje dhe mundësinë për t’u ndier pjesë e një familjeje. Rikthimi i shumëpritur i “ALI” është caktuar për 29 nëntor, në orën 19:00, ndërsa publiku do të ketë mundësi të shohë pamjet e para përmes promos zyrtare, e cila publikohet më 27 nëntor, në orën 16:00. Seriali do të transmetohet në platformën YouTube, në kanalin Puls Media Production, duke sjellë një histori ku emocionet, realiteti dhe mesazhet njerëzore bashkohen në një rrëfim të vetëm. A do ta gjejë Aliu familjen që kërkon dhe a do të marrë fund vuajtja e tij? Kjo mbetet të zbulohet në kapitullin e ri të serialit “ALI”.