Vetëdorëzimi i Jurgen Nezës vjen pas arrestimit të dy kushërinjve të tij, ndërsa hetimet zbulojnë një skemë rrëmbimi me maskim si agjentë të BKH-së dhe kërkesë fillestare prej 1 milion eurosh. Pas disa ditësh në kërkim policor, Jurgen Neza, 28 vjeç, është vetëdorëzuar në Policinë e Tiranës, duke u përfshirë kështu në hetimet për një nga rastet më të rënda të rrëmbimit të ndodhur së fundmi në kryeqytetin shqiptar.

Dorëzimi i tij vjen menjëherë pasi policia arrestoi dy bashkëpunëtorët e dyshuar, vëllezërit Hysen dhe Kevin Neza – kushërinj të tij – të cilët dyshohet se kanë pasur rol kyç në pengmarrjen e biznesmenit të ndërtimit, Florjan Sula. Ngjarja, sic raportojnë mediat shqiptare, ka ndodhur më 31 mars, në zonën e ish-Parkut të Autobusëve në Tiranë.

Sipas dosjes hetimore, autorët kishin vëzhguar për një kohë të gjatë lëvizjet e 32-vjeçarit, duke ndërtuar një plan të detajuar për rrëmbimin e tij. Në momentin e ndërhyrjes, ata (të veshur me të zeza dhe të maskuar) i janë prezantuar Sulës si agjentë të Byrosë Kombëtare të Hetimit (BKH), duke e mashtruar dhe detyruar të hipte në automjet.

Pas rrëmbimit, biznesmeni është dërguar në një ambient në zonën e Xhafzotajt, ku, sipas hetimeve, ndaj tij është ushtruar dhunë fizike dhe presion psikologjik. Fillimisht, pengmarrësit kanë kërkuar 1 milion euro në këmbim të lirimit. Pasi viktima ka deklaruar se nuk dispononte një shumë të tillë, kërkesa është ulur në 500 mijë euro. Sula është liruar me kusht që të siguronte paratë brenda një afati të caktuar. Pas lirimit, Sula ka denoncuar rastin në polici, duke vënë në lëvizje hetimet.

Edhe pse autorët kishin qenë të maskuar, analizimi i kamerave të sigurisë përgjatë itinerarit të lëvizjes së tyre ka bërë të mundur identifikimin.

Operacioni policor çoi në arrestimin e Hysen dhe Kevin Nezës, ndërsa në cilësinë e provave materiale u sekuestruan:

pesë automjete të përdorura në krim,

pesë telefona celularë,

shuma parash dhe sende të tjera të kundërligjshme.

Jurgen Neza u shpall në kërkim deri në momentin e vetëdorëzimit, ndërsa hetimet vazhdojnë për të zbardhur rolin konkret të secilit të përfshirë në këtë skemë.

Jurgen Neza është djali i Gazmend Nezës, aksionar në shoqërinë e sigurimeve “Eurosig” Sh.a., një kompani me aktivitet në Shqipëri dhe Kosovë.

Në Kosovë, “Eurosig” operon si degë e kontrolluar plotësisht nga kompania mëmë në Shqipëri.