Shkruan: Hajdin Abazi

Duke i lexuar kohëve të fundit disa deklarata deputetësh të pushtetit dhe sot edhe deklaratën e zëvendëskryeministrit dhe kryediplomatit të Kosovës z. Konjufca se “Shkojmë në zgjedhje të reja nëse është vullneti i opozitës. Nuk kemi çka të bëjmë!”, logjikisht mund të nxirren dy konstatime të tërthorta: njëri se opozita është aq e fuqishme sa që po e detyron pushtetin të shkojë në zgjedhje që nuk i dashka aspak partia në pushtet, e tjetra se pushteti është aq polite kundrejt opozitës sa po ia përfill vullnetin asaj!
E pra, as njëra e as tjetra nuk janë të vërteta. Madje është krejt e kundërta. Është partia në pushtet ajo që po eskivon dhe po bën manovra skuthërisht, duke deklaruar se do zgjidhje për presidentin e jo zgjedhje, kurse në të vërtetë po bën krejt të kundërtën. Të paktën deri më sot.
Pushteti po krijon opinionin, në frekuenca të njëjta si për zgjedhjet e 28 dhjetorit 2025, se opozita është destruktive, dhe kjo konsiston në atë se opozita nuk po bën ashtu sikurse po do pushteti – e një opozitë të tillë fort do ta donte pushteti, porse një e tillë do të ishte vasale e pushtetit.
Në demokraci opozita duhet t’i mbrojë interesat e veta, sepse ashtu e pengon pushtetin të kthehet në autoritarizëm. E pra, me sa duket, pikërisht kjo po e pengon pushtetin. Thjesht, ajo po e sheh opozitën si pengesë për ta kapur tërësisht shtetin një parti e vetme. Prandaj po e fajëson për gjithçka opozitën, sa që krijohet përshtypja se duan ta zhdukin fare! Sipas këtij vizioni, më mirë është fare pa opozitë, se sa me një e cila përpiqet, ani se tejet dobët, të kundërshtojë dhe me këtë të mbrojë sado pak demokracinë.
Është interesant se kudo në vendet demokratike shigjetat e përgjegjësisë i drejtohen pushtetit nga opozita, kurse te ne ndodhë e kundërta: pushteti e lë përgjegjëse opozitën! Në të vërtetë, pushteti e di fare mirë se si duhet vepruar dhe se ç’duhet bërë për të gjetur zgjidhje, porse ajo po shtihet se gjoja po bën gjithçka – kur në fakt ende nuk ka bërë ndonjë gjë serioze dhe të njëmendtë për zgjedhjen e presidentit të Republikës. Të lihet kjo në ditët e orët e fundit është për të ngjallur averzion te elektorati kundrejt opozitës, po jo edhe përpjekje reale për të shmangur zgjedhjet.