Shkruan: Astrit Gashi 

Në një atmosferë të organizuar, me tone uniteti politik dhe orientim të qartë europian, VLEN mbajti Kongresin e Bashkimit, ku miratoi programin politik, zgjodhi organet drejtuese dhe prezantoi vizionin për një model të ri të përfaqësimit shqiptar në Maqedoninë e Veriut

Kongresi, ku morën pjesë delegatë, përfaqësues politikë dhe struktura partiake nga të gjitha trevat shqiptare në vend, u paraqit si një përpjekje për ta larguar politikën shqiptare nga kultura tradicionale ballkanike e tensionit, konfliktit dhe retorikës emocionale, duke promovuar një frymë më institucionale, më europiane dhe më të afërt me modelin politik të vendeve skandinave, ku dialogu, përgjegjësia dhe kultura demokratike vendosen mbi përplasjen dhe polarizimin.

Në kongresin e bashkimit të VLEN-it, i mbajtur me pjesëmarrje të gjerë të delegatëve, strukturave partiake dhe përfaqësuesve politikë shqiptarë nga e gjithë Maqedonia e Veriut, VLEN ka miratuar programin e ri politik dhe ka zgjedhur organet e reja drejtuese të koalicionit, duke shënuar një etapë të re në organizimin dhe konsolidimin politik të shqiptarëve në vend.

Kongresi ka votuar Kuvendin me 105 anëtarë. Për bashkëkryetarë të VLEN-it janë zgjedhur Izet Mexhiti dhe Bilall Kasami, ndërsa postin e sekretarit të përgjithshëm do ta mbajë Bekim Sali.

Në funksionin e nënkryetarëve janë emëruar Mimoza Musa dhe Bekim Qoku.

Në këtë kongres, VLEN miratoi edhe platformën politike me fokus në fuqizimin kombëtar të shqiptarëve, barazinë institucionale, zhvillimin ekonomik dhe orientimin euro-perëndimor. Programi politik e definon VLEN-in si një forcë të re politike të qendrës së djathtë, e ndërtuar mbi vlerat e dinjitetit, punës, familjes, meritokracisë dhe shtetit ligjor.

Në qendër të programit qëndron shqiptari në Maqedoninë e Veriut si popull shtetformues, me kërkesë për përfaqësim të drejtë, përdorim real të gjuhës shqipe, zbatim të plotë të Marrëveshjes së Ohrit dhe ndërtim të institucioneve që garantojnë barazi reale dhe jo vetëm simbolike.

VLEN deklaroi se synon ta shndërrojë energjinë politike shqiptare në fuqi institucionale, zhvillim ekonomik dhe përfaqësim dinjitoz, duke premtuar fundin e politikës së klientelizmit, korrupsionit dhe retorikës boshe.

Mesazhi qendror i kongresit ishte se shqiptarët në Maqedoninë e Veriut nuk kërkojnë privilegje, por shtet të drejtë, institucione funksionale dhe një të ardhme europiane të ndërtuar mbi barazi dhe dinjitet kombëtar.

Në përmbyllje të kongresit u theksua edhe orientimi ideologjik i VLEN-it si forcë politike e qendrës së djathtë, me synim integrimin në familjen më të madhe politike në Europë — European People’s Party (EPP), grupi më i madh parlamentar në Parlamentin Europian. VLEN e sheh këtë rrugëtim si pjesë të natyrshme të identitetit të tij politik pro-europian dhe konservator demokratik, duke paralajmëruar se shumë shpejt synon të bëhet pjesë e kësaj familjeje politike europiane, për ta lidhur më fort zërin politik të shqiptarëve në Maqedoninë e Veriut me qendrat vendimmarrëse të Europës.